ޖޫން މަހު ސީޒަން ފަށާނަމަ އެފަދަ ބޮޑު ބަދަލެއް ގެނައުމުގެ ކުރިން ވަރަށް ފުޅާދާއިރާއެއްގައި މަޝްވަރާކުރަން ޖެހޭނެ ކަމަށް ތަޖުރިބާކާރު ކޯޗު މުހައްމަދު ޝިޔާޒް (މޯހަން) ބުނެފިއެވެ.
ގައުމީ ޓީމުގެ އެސިސްޓެންޓް ކޯޗުކަމާއި އީގަލްސް އާއި ނިއު އަދި ވެލެންސިއާގެ ކޯޗުކަން ކޮށްފައިވާ މޯހަން ބުނީ އަހަރުގެ މެދުތެރޭގައި ސީޒަން ފެށުމަކީ ފުރަތަމަ ޑިވިޝަނުގެ 8 ކުލަބާއެކު އެކަނި މަޝްވަރާކޮށްގެން ނިންމާލެވޭ ވަރަށްބޮޑު ސީރިއަސް މައްސަލައެއް ކަމަށެވެ.
ސަބަބަކީ މިފަދަ ބޮޑު ބަދަލެއްގެ ސަބަބުން އެތައް ބަޔަކަށް އޭގެ ގެއްލުން ފޯރުން ކަމަށާއި މިފަދަ ބަދަލަކީ ސީދާކޮށް ކުޅުންތެރިންނަށް ވަރަށް ބޮޑަށް އަސަރުކުރާނެ ކަމެއް ކަމަށެވެ.
މޯހަން ބުނީ ޑިސެމްބަރު މަހަކީ ވަރަށް ގިނަ ރަށްރަށުގައި މުބާރާތް ބާއްވާ ދުވަސްވަރަށްވާއިރު އެއީ ބޮޑު ޗުއްޓީ ދުވަސްވަރަށްވުމުން ރާއްޖޭގެ ސީޒަން އެ ދުވަސްވަރު ކުރިއަށް ގެންދާނަމަ އާ ކުޅުންތެރިން ތައާރަފްވުމަށް ވެސް ހުރަސްތައް އެޅިގެންދާނެ ކަމަށެވެ. ސަބަބަކީ އެފަދަ މުބާރާތްތައް ހިންގަން ދަތިވުމުގެ އިތުރަށް ކުޅުންތެރިން ސްކައުޓް ކުރުމަށް ވެސް ދަތިވާނެތީ ކަމަށެވެ.
"މިއީ ވަރަށް ބޮޑުކަމެއް. މިއީ ހަމައެކަނި ކުލަބްތަކާއި ވާހަކަދައްކައިގެން ނިންމާލެވޭ ވަރުގެ ކަމެއްނޫން. ޔޫތް މިނިސްޓްރީ، އެޑިޢުކޭޝަން މިނިސްޓްރީ، ކުލަބްތަކުގެ މެނޭޖްމަން އަދި ސަޕޯޓަރުންނާއި އެކުވެސް މިފަދަ ބޮޑު ބަދަލެއް ގެންނައިރު މަޝްވަރާ ކުރަންޖެހޭ. ނޮވެމްބަރ އަދި ޑިސެމްބަރ މަހުގެ ބޮޑު ބަންދާއި ދިމާވާއިރު ކަންތަށްތަށް ކުރާނީ ކިހިނެއްތޯވެސް ސުވާލް އުދެފޭ. އެދުވަސްވަރު މެޗްތަށް ކުޅޭނީ ތޯ ނުވަތަ އެދުވަސްވަރު ބްރޭކްއެއް ނަގާނީ ތޯ. މިއީ ހައްތަހާވެސް މަޝްވަރާ ކުރަންޖެހޭ ކަންތަށްތަށް."
އެފްއޭއެމުން ޖޫން މަހު ސީޒަން ފަށަން މިހާޜު ނިންމަން ތައްޔާރުވެފައިވާއިރު މިކަމަށް އެއްބަސްވީ ފުރަތަމަ ޑިވިޝަނުގެ 8 ކުލަބުގެ ތެރެއިން 6 ކުލަބެވެ،