އޭނާގެ ކުރިމަގާމެދު އަދި ގޮތެއް ނުނިންމާ ކަމަށް ބާސެލޯނާގެ ކޯޗު އާނެސްޓޯ ވަލްވާޑޭ ބުނެފި އެވެ.
އޭނާ މިހެން ބުނީ މި ސީޒަނަށް ފަހު ޓީމާ ވަކިވެދާނެ ކަމަށް ނުސީދާކޮށް ބުނެފައިވާތީވެ އެކަމުގެ ތަފްސީލުދޭން ނޫސްވެރިން އެދުމުންނެވެ.
ވަލްވާޑޭ ބުނީ އޭނާ ބާސެލޯނާއާއެކު ހެދި ދެ އަހަރުގެ ކޮންޓްރެކްޓްގެ މުއަދަތު އިތުރު އަހަރަކަށް ދަންމާލެވިދާނެ ކަމަށާއި ނަމަވެސް ގޮތެއް ނިންމާނީ ސީޒަން ނިމުމުން ކަމަށެވެ.
"އަހަންނާއި ކުލަބާ ދެމެދު ރަނގަޅު އަންޑަސްޓޭޑިންއެއް އެބައޮތް. އަހަރެން އުއްމީދު ކުރަނީ ރަނގަޅު ގޮތަކަށް ކަންކަން ހަމަޖެހިގެންދާނެ ކަމަށް. ސަބަބަކީ ފުޓްބޯޅައިގައި މޮޅު ނުވަންޏާ އަބަދުވެސް ޕްރެޝަރު އޮންނާނީ ކޯޗަށް. އަދި އެނޫން ކަންކަން ހުރޭ ޕްރެޝަރު ކުރިމަތިވާ،" ކޯޗު ބުންޏެވެ.
ވަލްވާޑޭ ޓީމާ ހަވާލުވީ މިދިޔަ ސީޒަނުގަ އެވެ. އޭނާ ވަނީ މިދިޔަ ސީޒަނުގެ ސްޕެނިޝް ލީގާއި ސްޕެނިޝް ކަޕް ކާމިޔާބުކޮށްދީފަ އެވެ.