މިހާރު ކުރިއަށްދާ ޖެނުއަރީ ޓްރާންސްފާރ މާކެޓުގައި ލިވަޕޫލަށް އާ ކުޅުންތެރިއަކު ނުގެންނާނެ ކަމަށް އެ ޓީމުން ބުނެފިއެވެ.
ކޯޗު ޔާގެން ކްލޮޕް މިހެން ބުނީ ޓީމުގެ ދެ ކުޅުންތެރިއަކު ދޫކޮށްލުމަށްފަހުއެވެ. ޒުވާން ފޯވަޑް ޑޮމެނިކް ސޮލަންކޭ 19 މިލިއަން ޕައުންޑަށް ވިއްކާލިއިރު ނެތަނިއަލް ކްލައިން ދޫކޮށްލީ ސީޒަނުގެ ނިޔަލަށް ލޯނު އުސޫލުންނެވެ.
މިއާއެކު ލިވަޕޫލްގައި މިވަގުތު ހުރީ ކަނާތް ފަޅިން ފަހަތަށް ކުޅޭ އެންމެ ކުޅުންތެރިއެކެވެ. އެއީ އެލެގެޒެންޑާ އާނޮލްޑް އެކަންޏެވެ.
ކްލޮޕް ބުނީ ޓީމުގައި މިހާރު ތިބި ކުޅުންތެރިންނާމެދު ހިތްހަމަޖެހޭ ކަމަށާއި، ފުޓްބޯޅަ އަކީ އެއްގޮތަކުން ވިޔަފާރިއެއްކަމަށެވެ. ކޯޗުން ކުޅުންތެރިންނަށްވެސް ބަލަންޖެހޭކަމަށާއި އަދި އެކުޅުންތެރިން ބޭނުންވާ ކަންތައްތައްވެސް ބަލަންޖެހޭކަމަށް ކުލޮޕް ބުންޏެވެ.
އޭނާ ބުނީ އިނގިރޭސި އެފްއޭކަޕުގައި ބައެއް ކުޅުންތެރިންނަށް އަރާމުކުރަން ފުރުސަތުދޭނެ ކަމަށެވެ. މި ގޮތުން އެފްއޭކަޕު މެޗުގައި ކީޕަރަށް ކުޅޭނީ ބަދަލު ކީޕަރު ސިމޯން މިންޚޮލޭއެވެ.