އޭޝިއަން ކަޕުގައި އިންޑިޔާ އަތުން 4-1އިން ހައިރާންކުރުވަނިވި ގޮތަކަށް ބަލިވުމާއެކު ތައިލެންޑްގެ ކޯޗު މިލޮވަން ރަޖަވަކް މަގާމުން ވަކިކޮށްފިއެވެ.
ތައިލެންޑްގެ ފުޓްބޯޅަ އެސޯސިއޭޝަނުން ބުނީ މިއީ ތައިލެންޑްގެ އެންމެންވެސް ކާމިޔާބީއަށް އެދޭ މުބާރާތެއް ކަމަށާއި ފުރަތަމަ މެޗުގައި ލިބުނު ޝޮކް ނަތީޖާ އަކީ ބަލައިގަނެވޭވަރަށްވުރެ ގޯސް ނަތީޖާއެއް ކަމަށެވެ.
މި މޮޅަކީ އިންޑިޔާއިން 1964ގެ ފަހުން މި މުބާރާތުގައި ހޯދި ފުރަތަމަ މޮޅު. އަދި މިއީ 2011 ވަނަ އަހަރުގެ މުބާރާތުގައި ވާދަކޮށް ގްރޫޕް ސްޓޭޖުން ކަޓާފައިވާތީ އާއި މިދިޔަ އަހަރުގެ ސާފް ސުޒުކީ ކަޕް ފައިނަލްގައި ރާއްޖެ އަތުން ބަލިވުމުން އަމާޒުވެފައިވާ ފާޑުކިއުންތަކަށް އިންޑިޔާއިންދިން ވަރަށް ރަނގަޅު ރައްދު ޖަވާބެކެވެ.
ކޯޗު ސްޓެފަން ކޮންސްޓިންޓިން މެޗަށް ފަހު ބުނީ މި ނަތީޖާގެ ސަބަބުން އިންޑިޔާގެ ކުޅުންތެރިން ހަމަބިމުން ކަޓާކަށް އޭނާ ބޭނުންނުވާ ކަމަށެވެ. އަމާޒަކީ ދެ ވަނަ ބުރަށް ދިއުން ކަމަށާއި އެކަމަށް ހުރަސް އެޅޭނެ އެއްވެސް ކަމެއް ކުރަން ބޭނުންނުވާ ކަމަށެވެ.
އިންޑިޔާ ހޯދި މި ނަތީޖާ އަށް ދުނިޔޭގެ ފުޓްބޯޅައިގެ އެކި ފަރާތްތަކުންދަނީ އެ ގައުމަށް ވަރަށް ބޮޑަށް ތައުރީފް ކުރަމުންނެވެ. އިއްޔެގެ މެޗުގައި އިންޑިޔާ މޮޅުކޮށްދިނުމުގައި އެންމެ މުހިންމު ދައުރެއް އަދާކޮށްދިނީ ތަޖުރިބާކާރު ފޯވަޑް އަދި ކެޕްޓަން ސުނިލް ޗެތްރީއެވެ. އޭނާ ވަނީ ދެ ލަނޑު ކާމިޔާބުކޮށްދީފައެވެ. އަނެއް ދެ ލަނޑު ޖެހީ އަނީރުދްތާޕާ އާއި ޖޭޖޭ ލާލްޕެކޫލާއެވެ. ތައިލެންޑްގެ ހަމައެކަނި ލަނޑު ޖެހީ ތީރަސިލް ޑަޑާއެވެ.
މުބާރާތުގެ ގްރޫޕް ސްޓޭޖުގައި އިންޑިޔާ ދެންކުޅެން ޖެހޭނީ ބަހްރޭން އަދި ޔޫއޭއީއާއެވެ.