ކްރޫސް އަށް އަނިޔާވެ ރެއާލް މެޑްރިޑްގެ އަނިޔާގެ ލިސްޓް އިތުރުވެއްޖެއެވެ.
އެކުލަބުން ބުނެފައިވަނީ ޖަރުމަނުގެ މިޑްފީލްޑަރަށް އަނިޔާވީ ރެއާލް ސޮސިއެޑާޑް އަތުން ބަލިވި މެޗުގައި ކަމަށާއި، ކްރޫސްއަށް އެނބުރި ކުޅުމާ ބައިވެރިވެވޭނީ މަދުވެގެން ތިން ހަފުތާ ފަހުން ކަމަށެވެ.
މި އަނިޔާގެ ސަބަބުން އޭނާ އަށް މުހިންމު ހަތަރު މެޗެއް ގެއްލޭނެއެވެ. އެއީ ކޮޕާޑެލްރޭގައި ލެގަނެސްއާ ދެކޮޅަށް ކުޅެންޖެހޭ ދެ މެޗާއި ލީގުގައި ސެވިއްޔާ އާއި ރެއާލް ބެޓިސްއާ ދެކޮޅަށް ކުޅޭ މެޗެވެ. އަދި ކޮޕާޑެލްރޭ ކުއާޓާ ފައިނަލުގެ މެޗެއްވެސް ކްރޫސްއަށް ގެއްލުން ގާތްކަމަށް ބެލެވެއެވެ. ކްރޫސްއަކީ މިދިޔަ ތިން ސީޒަންގައިވެސް ރެއާލް މެޑްރިޑްގެ މިޑްފިލްޑް ލައިނުގައި މުހިންމު ދައުރެއް އަދާކުރި ކުޅުންތެރިއެކެވެ.
ޓޯނީ ކްރޫސް އަށް އަނިޔާވިއިރު މުހިންމު ކުޅުންތެރިން ކަމަށްވާ މާކޯ އަސެންސިއޯ އާއި މާކޯސް ލޮރަންޓޭ އަދި ގެރެތް ބޭލް އާއި މަރިއާނޯ ޑިއާޒް މިހާރުވެސް ތިބީ އަނިޔާގައެވެ.
މިއީ އެއްވަނާގައިވާ ބާސެލޯނާ އަށްވުރެ 10 ޕޮއިންޓް ފަހަތުގައި އޮތް ޓީމަށް ކުރިމަތިވާނެ ވަރަށް ބޮޑު މައްސަލައަކަށްވާނެއެވެ.