އެފްރިކާގެ އެންމެ މޮޅު ކުޅުންތެރިޔާގެ މަގާމު ލިވަޕޫލްގެ މިސުރު ފޯވަޑް މުހައްމަދު ސަލާހު ދިފާއުކޮށްފިއެވެ.
އެފްރިކާގެ އެންމެ މޮޅު ކުޅުންތެރިޔާގެ މަގާމަށް ސަލާހާ އެންމެ ގާތުން ވާދަކުރި ލިވަޕޫލްގެ ސާދިއޯ މާނޭ އާއި އާސެނަލްގެ ޕިއޭ އެމްރިކް އައުބަމަޔަންގއެވެ.
ސަލާހް ވަނީ މިދިޔަ ސީޒަނުގައި ލިވަޕޫލަށް ގިނަ ގޯލުތަކެއް ޖަހައިދީ ޗެމްޕިއަންސް ލީގުގެ ފައިނަލަށް ލިވަޕޫލް ގެންގޮސްދިނުމުގައި މުހިންމު ދައުރެއް އަދާކޮށްފައެވެ. މި ސީޒަންގައި ޕްރިމިއަރ ލީގްގައިވެސް ސަލާހް ވަނީ މިހާތަނަށް 13 ގޯލް ލިވަޕޫލަށް ޖަހައިދީފައެވެ. އަދި މިދިޔަ އަހަރު ބޭއްވި ވޯލްޑް ކަޕަށް މިސުރު ކޮލިފައިކޮށްދީ އޭނާ ވަނީ ވޯލްޑް ކަޕުގައި ދެ ގޯލު ޖަހާފައެވެ.
ސަލާހް ބުނީ ދެ ވަނަ ފަހަރަށް އެވޯޑް ލިބުމުން ވަރަށް އުފާވާ ކަމަށާއި އެވޯޑް ހާއްސަކުރަނީ މިސުރުގެ ރައްޔިތުންނަށް ކަމަށެވެ.
މިއީ މިސްރު ކުޅުންތެރިއަކަށް މި އެވޯޑް ލިބުނު ތިން ވަނަ ފަހަރެވެ.