ބްރައިޓަން 1-0 އިން ބަލިކޮށް އިނގިރޭސި ޕްރެމިއާ ލީގުގެ ތާވަލުގެ އެއްވަނައިގައި ލިވަޕޫލް ހަތް ޕޮއިންޓަށް ލީޑް ފުޅާކޮށްފި އެވެ.
މި މެޗުގެ ހަމައެކަނި ލަނޑު ޖެހީ ފަހު ހާފުގައި ލިބުނު ޕެނަލްޓީ އަކުން މުހައްމަދު ސަލާހެވެ. މި މޮޅާއެކު ލިވަޕޫލަށް ވަނީ 57 ޕޮއިންޓް ލިބިފަ އެވެ. ދެވަނާގައި އޮތް ޗެމްޕިއަން މެންޗެސްޓާ ސިޓީ އަށް ލިބިފައިވަނީ 50 ޕޮއިންޓެވެ. ސިޓީ މާދަމާ ރޭ ކުޅޭނީ ވޮލްވަހެމްޓަންއާ އެވެ. ބްރައިޓަން އޮތީ 26 ޕޮއިންޓާއެކު 13 ވަނާގަ އެވެ.
ރޭގެ މެޗަށް ފަހު ލިވަޕޫލްގެ ޔާގެން ކްލޮޕް ބުނީ އޭނާގެ ޓީމު މޮޅުވީ ވަރަށް ވިސްނުންތެރިކަމާއެކު ޓީމެއްގެ ގޮތުގައި ކުޅެގެން ކަމަށެވެ.
"އެންމެނަށް ވެސް އެނގޭނެ ބްރައިޓަންއާ ކުޅުމަކީ ކިހާ އުނދަގޫ ކަމެއްކަން. އަހަރުމެން ދެ ވަނަ ހާފަށް ނުކުތީ ފުރަތަމަ ހާފުގައި ލަނޑެއް ނުޖެހުމުން ވަރަށްގިނަ ކަންތައްތައް ދަސްކޮށްގެން. އެމީހުން ވަރަށް ބޮޑަށް ހުސްޖާގަތައް ބައްދައިގެން ކުޅުނީ. މީގެ ސަބަބުން ވަރަށް އުނދަގޫވި ނަތީޖާ ނެރެން. އެކަމަކު މޮޅުވުމަކީ ވަރަށް ރަނގަޅު ނަތީޖާއެއް،" ކްލޮޕް ބުންޏެވެ.
އޭނާ ބުނީ މި ސީޒަނުގައި ލިވަޕޫލް ދައްކަމުން އަންނަ ކުޅުމާމެދު ވަރަށް ބޮޑަށް ހިތްހަމަޖެހޭ ކަމަށެވެ. ނަމަވެސް ސީޒަނުގައި ބާކީ އަދިވެސް 16 މެޗު އޮތުމުން ވަރަށް ވިސްނުންތެރިކަމާއެކު މެޗުތަކުން މޮޅުވާންޖެހޭ ކަމަށެވެ.