ދުނިޔޭގެ އެންމެ ވާދަވެރި ދެ ޓީމު ކަމަށްވާ ސްޕޭނުގެ ރެއާލް މެޑްރިޑާއި ބާސެލޯނާ އެއް މަސްދުވަހުގެ ތެރޭގައި ތިން ފަހަރަށް ކުޅެން ޖެހިއްޖެ އެވެ.
މި ގޮތަށް ދިމާވީ ސްޕެނިޝް ކަޕުގެ ސެމީ ފައިނަލުގައި މި ދެ ޓީމު ކުޅެން ޖެހުމުންނެވެ.
ސްޕެނިޝް ކަޕުގެ ފުރަތަމަ ލެގުގައި މި ދެ ޓީމު ކުޅޭނީ އަންނަ ބުދަ ދުވަހުގެރެއެވެ. ދެ ވަނަ ލެގުގެ މެޗު ކުޅޭނީ ފެބްރުއަރީ 27ގައެވެ. މި ދެ ޓީމު ކުޅޭ ތިން ވަނަ މެޗަކީ ސްޕެނިޝް ލީގުގައި އަންނަ މަހުގެ 2 ވަނަ ދުވަހު ކުޅޭ މެޗެވެ.
މި ތިން މެޗަކީ ވެސް ވަރަށް ވާދަވެރި އަދި ފޯރިގަދަ ކުރިމަތިލުންތަކަކަށް ވެގެންދާނެއެވެ. ސަބަބަކީ ސްޕެނިޝް ކަޕާއި، ލަލީގާގައިވެސް ދެ ޓީމު އޮތީ ވަރަށް ވާދަވެރި ހިސާބެއްގައި އޮތުމެވެ.
ބާސެލޯނާގެ ކޯޗު އާނެސްޓޯ ވަލްވާޑޭ ބުނީ މިއީ ސަޕޯޓަރުންނަށް ވަރަށް ކަމުދާނެ ކަމެއް ކަމަށެވެ. ނަމަވެސް މިއީން ކޮންމެ މެޗަކީ ވެސް ވާދަވެރި އަދި މޮޅުވާން ޖެހޭ މެޗަކަށްވުމުން ބާސެލޯނާއިން މެޗަށް ދޭ ސަމާލުކަން ވަރަށް ބޮޑުވާނެ ކަމަށެވެ. ރެއާލް މެޑްރިޑުން ވެސް ވަނީ ބާސެލޯނާ މެޗަކީ އާހިތްވަރަކާއެކު ނުކުންނަން ޖެހޭ މެޗެއް ކަމަށް ބުނެފައެވެ.