ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި 39 ރިސޯޓެއްގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ނިންމައިފިއެވެ.
އިލެކްޝަންސް ކޮމިޝަނުން ވިދާޅުވީ 39 ރިސޯޓްގައި ވޯޓު ފޮށި ބެހެއްޓުމަށް ނިންމާފައިވީނަމަވެސް، ވޯޓު ފޮށި ބަހައްޓާނީ، ވޯޓުލުމަށްޓަކައި ފަންސާސް މީހުންނަށްވުރެ ގިނަ މީހުން ރަޖިސްޓްރީ ކުރާ ރިސޯޓްތަކުގައިކަމަށެވެ. ވޯޓު ފޮށި ބެހެއްޓުމަށް ނިންމި ރިސޯޓްތަކުގެ ތަފްސީލް އިލެކްޝަނސް ކޮމިޝަނުން ހާމަކޮށްފައެއްނުވެއެވެ. އެހެންނަމަވެސް ރިޔާސީ އިންތިޚާބުގައި ވޯޓު ފޮށި ނުބަހައްޓާ އަށް ރިސޯޓް ހިމެނޭއިރު ކުރިން ވޯޓު ފޮށި ބެހެއްޓި ހަތަރު ރިސޯޓެއްގައި މިފަހަރު ވޯޓު ފޮށި ނުބެހެއްޓުމަށް ވަނީ ނިންމާފައެވެ.
އަންނަ މަޖިލިސް އިންތިޚާބުގައި ފަންސާސް މީހުން ރަޖިސްޓްރީ ކުރާ ރިސޯޓްތަކުގައި ވޯޓު ފޮށި ބެހެއްޓުމަށް އީސީން ނިންމާފައިވާއިރު، މީގެ ކުރީގެ އިންތިޚާބުގައި ވޯޓު ފޮށި ބަހައްޓާފައިވަނީ ސަތޭކަ މީހުންނަށްވުރެ ގިނަ މީހުން ރަޖިސްޓްރީ ކޮށްފައިވާ ރިސޯޓްތަކުގައި އެކަންޏެވެ.
އަންނަ އޭޕްރީލް މަހުގެ ހަވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބުގައި ރަށްރަށުގައި ބަހައްޓާ ވޯޓު ފޮށިތަކުގެ ތެރެއިން ކޮންމެ ވޯޓު ފޮއްޓަކަށްވެސް އެންމެ ގިނަވެގެން ލެވޭނީ އެގާރަ ސަތޭކަ ވޯޓުކަމަށް އީސީން ވިދާޅުވެއެވެ. އަދި ރާއްޖެއިން ބޭރުގެ ހަތް ޤައުމެއްގައި ވޯޓު ފޮށި ބަހައްޓާނެ ކަމަށް އިލެކްޝަންސް ކޮމިޝަނުން ވިދާލުވެފައިވާއިރު، މި އިންތިޚާބުގައި ދުއިސައްތަ ފަސްދޮޅަސް ހަތަރުހާސް ފަސްސަތޭކަ އަށްޑިހަ ނުވަ މީހުންނަށް ވޯޓުދިނުމުގެ ޙައްޤުލިބިފައިވާކަމަށް އިލެކްޝަންސް ކޮމިޝަނުން ވިދާޅުވެއެވެ.