ރާއްޖޭގައި އަމާންކަން ގާއިމް ނުކުރެވިގެން އުޅެނީ ޤާނޫނުތަކުގައި ހުރި ލޯވަޅުތަކުގެ ސަބަބުންކަމަށާއި، ގާނޫނުތައް އިސްލާހު ނުކޮށް އަމާންކަން ގާއިމު ނުކުރެވޭނެ ކަމަށް ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.މިނިސްޓަރ އުމަރު ނަސީރު މިހެން ވިދާޅުވީ ފުލުހުންގެ 82 ވަނަ އަހަރީދުވަސް ފާހަގަކުރުމަށް ރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.މި ޖަލްސާގައި ވާހަކަފުޅު ދައްކަވަމުން ހޯމް މިނިސްޓަރ އުމަރު ނަސީރު ވިދާޅުވީ، ރައްޔިތުންނަށް ފެންނަނީ ކުށްވެރިން އެއްދޮރުން ވައްދާ އަނެއް ދޮރުން ނިކުމެގެންދާތަން ކަމަށާއި، ކުށްވެރިންނަށް ސަލާމަތް ވެވޭނެގޮތަށް ޤާނޫނުތަކުގައިހުރި ލޯވަޅުތަކާއި ދެ ފޮޅުވަތް ދޭތެރޭގައިހުރި ޖާގަތައް ރައްޔިތުންނަށް ނުފެންނަކަމަށެވެ. އަދި އާ ގާނޫނުއަސާސީއާ އެކު ހަދާފައިވާ ބައެއް ގާނޫނުތަކުގެ ސަބަބުން، ފުލުހުން ރެޔާއި ދުވާލު ކުރާ އިލްމީ ބުރަ މަސައްކަތްތަށް ވެގެންދަނީ ފޫނެއް ފަޔަށް ފެން ފުރުން ފަދަ ކަމަކަށް ކަމަށް މިނިސްޓަރ ވިދާޅުވިއެވެ. އަދި ކުށްވެރީންގެ ކިބައިން ރައްޔިތުންނާއި މުޖުތަމައު ސަލާމަތް ކުރުމަށް ހިންގޭ އަގު ބޮޑު އެތައް އޮޕަރޭޝަނެއް ބޮޑެތި ހަރަދުތަކާއި ބުރަ މަސައްކަތްތަކާއި ގިނަ ވަގުތުތައް ހޭދަވުމަށް ފަހު އާހިރު ނަތީޖާގައި އެ ކަންކަން ދަނީ ފަނުފުލުން ކަމަށްވެސް މިނިސްޓަރ ވިދާޅުވިއެވެ. އެހެންކަމުން ޑިމޮކްރަސީގެ ނަމުގައި އިމްޕޯޓްކޮށްފައިވާ ގާނޫނުތައް ކޮށައި، މަށައި މި ގައުމަށް ހެޔޮވަރުކޮށް ގާނޫނުތައް ހަދައިގެން ނޫނީ ޑިމޮކްރަސީގެ ފޮނި މީރު ކަމެއް ދިވެހިންނަށް ނުލިބޭނެކަމަށް ވިދާޅުވިއެވެ.ކުށެއްގެ ތުހްމަތުގައި ހައްޔަރުކުރެވޭ މީހަކު 24 ގަޑިއިރު ތެރޭގައި ކޯޓަށް ހާޒިރުކުރުމަކީ މިހާރު ކުރަންޖެހޭ ކަމެއް ކަމަށްވެސް މިނިސްޓަރ އުމަރު ނަސީރު ވިދާޅުވިއެވެ. ނަމަވެސް ދައުލަތުގެ ފުދުންތެރިކަމާ ރާއްޖެ އުފެދިފަ އޮތް ގޮތާއި ދައުލަތުގަ ހުރި ވަސީލަތްތަކަށް ބަލާއިރު، އެކަން ތަންފީޒުކުރުމަށް ވަރަށް ގިނަ ދަތިތަކެއް އެބަހުރިކަން މިނިސްޓަރ ފާހަގަކުރެއްވިއެވެ. އަދި އެފަދަ މައްސަލަތަކަށް ދައުލަތުގެ ފަރާތުން ގެންނަން ފެންނަ އިސްލާހުތައް ހޯދައި އެ އިސްލާހުތައް ރައްޔިތުންގެ މަޖިލީހަށް ފޮނުއްވާނެކަމަށްވެސް ވިދާޅުވިއެވެ.ރޭގެ ރަސްމިއްޔާތުގައި ވާހަކަ ދައްކަވަމުން ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވީ، ފުލުހުންގެ ޚިދުމަތަށް ގެންނާންޖެހޭ ޒަމާނީ ބަދަލުތައް ގެނައުމަށް ބޭނުންވާ އިލްމީ ޤާބިލުކަމާއި ތަޖުރިބާ ފުލުހުންނަށް ހޯދައިދިނުމަށް ބުރަ މަސައްކަތްތަކެއް ކުރެވެމުންދާކަމަށެވެ. އަދި ފުލުހުންގެ އަމާޒަކީ، ކޮންމެ ފުލުހަކީވެސް، އެމީހެއްގެ ދާއިރާއިން ދަށްވެގެން ޑިޕްލޮމާ ސަނަދު ހާސިލުކޮށްފައިވާ ފުލުހަކަށް ހެދުން ކަމަށްވެސް ކޮމިޝަނަރ އޮފް ޕޮލިސް ވިދާޅުވިއެވެ.ރޭގެ ރަސްމިއްޔާތުގައި ދިގުމުއްދަތެއްގައި ފުލުހުންނަށް ޚިދުމަތް ކޮށްދީފައިވާ ފަރާތްތަކަށާއި، ފުލުހުންނަށް ރީތި ނަން ހޯދާ ދީފައިވާ ފަރާތްތަކަށްވަނީ ހަނދާނީ ފިލާ ދެއްވާފައެވެ.