އޭޝިއަން ކަޕް ކޮލިފައިން 23 އަހަރުންދަށުގެ މުބާރާތުގެ ކޮލިފައިންގެ ފަހު މެޗުގައި ލުބުނާނު އަތުން 6-0އިން ބަލިވެ ޕޮއިންޓެއްވެސް ނުލިބި ކޮލިފައިން ނިންމާލައިފިއެވެ.
ސައުދީ އަތުން 6-0އިން އަދި ޔޫއޭއީ އަތުން 3-0އިން ބަލިވި ރާއްޖޭގެ ޓީމް ރޭ ލުބުނާނު އަތުން ރޭ ބަލިވިއިރު ކުރީ ދެ މެޗުގައި މޮޅަށް ކުޅުނު ކީޕަރު ހުސައިން ޝަރީފް ގިނަ މިސްޓޭކްތަކެއް ހެދިއެވެ.
ނަމަވެސް ކޯޗު ޕީޓަ ސެގަޓް ބުނީ ނަތީޖާ ގޯސްވި ނަމަވެސް ކުޅުންތެރިން ގޯސް ނުކުރާނެ ކަމަށެވެ. ސަބަބަކީ ރާއްޖޭގައި ޒުވާން ކުޅުންތެރިންގެ މުބާރާތެއް ނެތުމާއި މި ޓީމަށް އެކަށީގެންވާ ވަރަށް ޕްރެކްޓީސް ކުރެވިފައިނުވާތީކަމަށެވެ.
ކޯޗު ބުނީ ޓީމުގެ ކުރިމަގު ރަނގަޅު ކަމަށާއި ނަމަވެސް ޒުވާން ކުޅުންތެރިންނަށް މެޗު ތަޖުރިބާ ލިބުން ވަރަށް މުހިންމު ކަމަށެވެ. ރާއްޖެ ކުޅުނު ގްރޫޕުން ދެވަނަ ބުރުން ޖާގަ ހޯދީ ގްރޫޕްގެ އެއްވަނަ ހޯދި ޔޫއޭއީއާއި ދެވަނަ ހޯދި ސައުދީ އަރަބިއްޔާއެވެ.