ނުޙައްޤުން މުއްސަނދިކަން ހޯދުމަކީ ކުށެއް ކަމަށް، އާ ޤާނޫނުލް އުގޫބާތުގައި ކަނޑައަޅައިދިނުމަށް އެންޓި ކޮރަޕްޝަން ކޮމިޝަން، އޭސީސީން ބަންޑާރަ ނައިބުގެ އޮފީހަށް ހުށައަޅައިފިއެވެ.މިމަހުގެ ތޭރަ ވަނަ ދުވަހު އަމަލުކުރަން ފަށާ ގާނޫނުލް އުގޫބަތަށް އިސްލާހު ގެނައުމަށް އޭސީސީން ތޭރަ އިސްލާހެއް ހުށައަޅާފައިވާކަމަށް އޭސީސީން ބުނެއެވެ.ނުޙައްޤުން މުއްސަނދިކަން ހޯދި ކަމަށް ތުހުމަތު ކުރެވޭ މައްސަލަތަކުގައި ތުހުމަތު ކުރެވޭ ފަރާތްތަކާއި ސުވާލު ކުރެވޭނެ އަދި އާމްދަނީ ލިބުނު ގޮތް ތަހުގީގު ކުރެވޭނެ އެއްވެސް ގާނޫނީ ނިޒާމެއް ނެތުމުން ކޮރަޕްޝަންގެ ތެރޭގައި ހިމެނޭ މައިގަނޑު އެއް ކުށުގެ އަމަލު މުޅިން ދޫކޮށްލެވޭކަމަށް އޭސީސީ ހުށަހެޅި އިސްލާހުގައި ބުނެފައިވެއެވެ.އެކޮމިޝަނުން ބުނީ، އދ ގެ މުއާހަދާގެ ވިހި ވަނަ މާއްދާގައި ނުހައްޤު މުއްސަނދިކަމަކީ ކުށެއް ކަމަށް ކަނޑައަޅާފައި ނުވި ނަމަވެސް އެކަމަކީ ކުށެއް ކަމަށް ކަނޑައެޅުމަށް ހިތްވަރު ދީފައިވާ ކަމަށެވެ. އެގޮތުން ޗައިނާ، އާޖެންޓީނާ، ބޫޓާން ،އިންޑިޔާ ފަދަ ޤައުމުތަކުގައި އެއީ ކުށެއް ކަމަށް ކަނޑައަޅާފައިވާ ކަމަށް އޭސީސީން ބުނެފައިވެއެވެ.އޭސީސީން ބުނީ ނުހައްޤު މުއްސަނދިކަމެއް ހޯދުމަކީ އޭގެ ޒާތުގައި ކުށެއް ކަމުގައި ކަނޑައަޅާފައި ވާނަމަ، އެކަން ވާނީ އެކުށަށް އަރައިގަތުމަށް ވަސީލަތަކަށް ވެފައި އޮންނަ އެހެނިހެން ކުށްތަކަށް އަރައިގަތުމުގެ ކުށަކަށްކަމަށެވެ.އެހެންކަމުން، ކޮރަޕްޝަނުން ދުރުހެލިވެ ހުރެ، ކޮރަޕްޝަނަށް މަގުފަހިވާ ކަންކަން މަދުކުރުމަށް، މާލީ ބަޔާނުގެ ނިޒާމެއް އެންމެ ފުރިހަމަ ގޮތުގައި ތަންފީޒު ކުރުމަކީ މުހިންމު ކަމެއް ކަމުގައި އޭސީސީން ދެކޭ ކަމަށް އެކޮމިޝަނުން ބުނެއެވެ.