ކުލަބުތައް ހަރުދަނާވުމަށް އެފްއޭއެމުން ވަގުތުދީ ސީޒަން ފެށުން ލަސްކޮށްފައިވީ ނަމަވެސް ކުޅުންތެރިން ހޯދުން ފިޔަވައި ކުލަބުތައް ހަރުދަނާވުމަށް ކުރާ މަސައްކަތެއް ފެންނަން ނެތް ކަމަށް ކޯޗު މުހައްމަދު ނިޒާމް ބުނެފިއެވެ.
މިދިޔަ ދެ އަހަރުގެ ރާއްޖޭގެ އެންމެ މޮޅު ކޯޗު މިހެން ބުނީ ޕީއެސްއެމްގެ ދިވެހި ފުޓްބޯޅަ ޕްރޮގްރާމުގައި ވާހަކަދައްކަމުންނެވެ. ނިޒާމް ބުނީ ކުލަބުތަކުގެ ހިންގުން ހަރުދަނާ ނުވުމުގައި ގިނަ ކަންތައްތަކެއް އެކުލެވޭ ކަމަށެވެ. އޭގެ ތެރޭގައި ހިންގުމުގެ ޒަމާނީ ތަޖުރިބާ އާއި އިލްމު ނެތުމަކީ ވަރަށް ބޮޑު މައްސަލައެއް ކަމަށެވެ. ދެ ވަނަ ކަމަކީ މާލީ ގޮތުން ކުލަބުތަކަށް ކުރެވޭނެ މާބޮޑު ކަމެއްނެތުން ކަމަށެވެ. އޭގެ ސަބަބަކީ ފުޓްބޯޅައިގެ ތެރެއަށް ސިޔާސީ ކަންކަންވަދެފައިވާވަރުން މިނިވަންކަމާއެކު ކުލަބަކަށް މަސައްކަތް ކުރަން އޮތް ފުރުސަތު ހަނިވެފައިވުން ކަމަށް ނިޒާމް ބުންޏެވެ.
"ކޮންމެ ކުލަބްއެއްވެސް ބަލަނީ ބޮޑު މުސާރައިގައި ކުޅުންތެރިން ހޯދޭތޯ. ބަޖެޓް ސެކުވާރ ކުރުމަށްފަހު، ކުޅުންތެރިން ހޯދުމަށްފަހު ކުލަބްތަށް ތިބެނީ ދެން ފަރިތަކުރުންތަށް ފަށާނީ ކޮން ދުވަހަކުން ތޯ ބަލަން. އެދުވަހަށް ދެން ކުލަބްތަކުން އިންތިޒާރު ކުރަނީ. އަދިވެސް ނުފެނޭ މިލިބުނު ދުވަސްތަކުގައި ކުލަބް ކޮޅަށް ޖެހުމަށް ނުވަތަ ކުލަބްއަށް ފައިސާ ވަންނާވެ ގޮތެއް ހޯދުމަށް މަސައްކަތް ކުރާ ދަނެއް. މިއީ މިހާރު ހައްލުކުރަން ޖެހިފައިވާ ވަރަށް ބޮޑު މައްސަލައެއް. މިކަމުގައި އެފްއޭއެމްއިންވެސް ވަރަށް ބޮޑަށް މަސައްކަތް ކުރަން އެވަޖެހޭ. ސީޒަން ފެށުމުގެ ކުރިން ކުލަބްތަކުން ފުރިހަމަ ކުރަންޖެހޭ ކަންތަށްތަށް ނިންމާ، ކެޗް އެންމެ ބެލެންސް ޝީޓްއެއްގެ ދަށުން މަސައްކަތް ކުރުން ވަރަށް މުހިންމު." ނިޒާމް ބުންޏެވެ.
ނަމަވެސް އޭނާ ބުނީ ކުލަބުތަކުގެ ހިންގުން ހަރުދަނާނުކޮށް ދިވެހި ކުލަބުތަކުގެ ކުރިމަގެއް ނެތް ކަމަށާއި ގޮންޖެހުން ބޮޑަސް ރިސްކު ނަގާފައި މިއީ ކުރަން ޖެހިފައިވާ ކަމެއް ކަމަށެވެ.