ޤައުމީ ޔުނިވަރސިޓީގެ ފެކަލްޓީ އޮފް އެޑިއުކޭޝަންއިން، ކ.ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒަށް އެހީގެ ތަކެތި ހަދިޔާކޮށްފިއެވެ.ޤައުމީ ޔުނިވަރސިޓީގެ ފެކަލްޓީ އޮފް އެޑިއުކޭޝަންގެ ދަރިވަރުންނާއި ލެކްޗަރާއިން ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒަށް މިއަދު ކުރި ޒިޔާރަތުގައި އެހީގެ ގޮތުގައި އެ ސެންޓަރަށް ހަދިޔާކޮށްފައިވަނީ ފަރުނީޗަރާއި، އަންނައުނު ކަމަށް ޔުނިވަރިސިޓީން މައުލޫމާތު ދެއްވައެވެ.މީގެ އިތުރުންވެސް ގުރައިދޫ މަރުކަޒާ ގުޅޭ ގޮތުން މައުލޫމާތު ފޯރުކޮށްދިނުމާއި، ސެންޓަރުގައި ތިބި ބަލީމީހުންނާއެކީ ޔުނިވަރސިޓީގެ ދަރިވަރުން ވަގުތު ހޭދަކުރުމުގެ އިތުރަށް ތަފާތު ގިނަ ހަރަކާތްތަކެއް މިދަތުރުގައި ހިންގުމަށް ހަމަޖެހިފައިވާ ކަމަށް ޤައުމީ ޔުނިވަރސިޓީން މައުލޫމާތު ދެއެވެ.ގުރައިދޫ މަރުކަޒަށް ކުރި ޒިޔާރަތުގައި ޔުނިވަރސިޓީގެ ހަތްދިހަޔަށް ވުރެ ގިނަ ދަރިވަރުން ބައިވެރިވެފައިވެއެވެ.