ސްޓެލްކޯގެ އިންޖީނުތަކުން
ފެތުރުނު ތެޔޮ ވަހެއްގެ ސަބަބުން ކަލާފާން ސްކޫލްގެ ކިޔެވުން މެދުކަނޑާލާފައި
އޮތުމަށްފަހު ކުރިއެކޭވެސް އެއްގޮތަށް މާދަމާއިން ފެށިގެން ކިޔެވުން
އޮންނާނެކަމަށް އެޑިއުކޭޝަން މިނިސްޓްރީން ބުނެފިއެވެ. އެޑިއުކޭޝަން މިނިސްޓްރީން
ބުނީ، މިހާރު އެސަރަހައްދުގައި ފެތުރިފައިވާ ތޮޔަވަސް ކެނޑިފައިވާކަމަށެވެ.
ކަލާފާން ސްކޫލްގެ ޕްރިންސިޕަލް ރަހްމާ އަބްދުއް ރަހްމާން ވިދާޅުވީ، މާދަމާ އެސްކޫލްގެ
ކިޔެވުން އޮންނާނެކަމަށާއި، އެއަށްފަހު ގިނަ ކުދިން އެއްތަނަކަށް އެއްވުމަށްފަހު
އެފަދަ ކަމެއް ފާހަގަވޭތޯ ބަލާނެކަމަށެވެ. ރަހްމާ ވިދާޅުވީ، ފާއިތުވި ދެދުވަހަށް
ބަލާއިރު، އެސަރަހައްދުގައި އެފަދަ ތެޔޮވަހެއް މިހާރު ނެތްކަމަށެވެ. ނަމަވެސް
އަދިވެސް ދިރާސާތަކެއް ކުރެވެމުން އަންނަކަން ރަހްމާ ފާހަގަކުރެއްވިއެވެ.
އެންވަޔަރަމަންޓް މިނިސްޓްރީގެ ސްޓޭޓްމިނިސްޓަރ އަބްދުލް މަތީން ވިދާޅުވީ،
ކަލާފާން ސްކޫލް ހުރި ސަރަހައްދުގައި ދިރާސާތަކެއް ކުރުމަށް ފަހު މިހާރު ކުރިއަށް
ދަނީ އެސަރަހައްދު މޮނިޓަރ ކުރުމުގެ މަސައްކަތްކަމަށެވެ. އަދި ވަރަށް އަވަހަށް
ތެޔޮވަސް ދުވަން ދިމާވި ސަބަބު މީޑިއާއާއި ހިއްސާކުރާނެކަމަށެވެ. ބެލެވިފައިވާ
ގޮތުގައި ސްޓެލްކޯގެ އިންޖީނުގެއިން ތެލުގެ ވަސް ދުވައިގެން އެސަރަހައްދުގައި ހުރި
ކަލާފާން ސްކޫލްގެ ބައެއް ދަރިވަރުންނަށް އޭގެ އަސަރު ކުރުމާއި ގުޅިގެން ކަލާފާނު
ސްކޫލުގެ ކިޔެވުން ބުދަދުވަހުންފެށިގެން ވަނީ
މެދުކަނޑާލާފައެވެ.