ކުލަބަކަށް ކޯޗުކަންކޮށްދިނުމުގެ ވިސްނުމެއްނެތް ކަމަށް އިނގިރޭސި ކޯޗު ގެރެތް ސައުތްގޭޓް ބުނެފިއެވެ.
އޭނާ މިހެން ބުނީ ނޭޝަންސް ލީގުގެ ސެމީ ފައިނަލުން އިނގިރޭސިން ކެޓުމާއި ޗެލްސީގެ ކޯޗުކަމަށް ދިއުމަށް ޝައުގުވެރިވަންތޯ ނޫސްވެރިން ސުވާލުކުރުމުންނެވެ. ސައުތްގޭޓް ބުނީ މިހާރު އޭނާގެ ހަމައެކަނި ވިސްނުމަކީ 2020ގެ ޔޫރޯއަށް އިނގިރޭސިން ކޮލިފައިކޮށްދިނުންކަމަށެވެ. ޒުވާން ކުޅުންތެރިންނާއިއެކު އިންގްލެންޑުން ބޮޑެތި ކުރިއެރުންތަކެއް ހޯދަމުން އަންނައިރު، މި ޓީމް ދޫކޮށްލަން ބޭނުންނުވާކަމަށް ސައުތްގޭޓް ބުނެފިއެވެ. އޭނާގެ އެސިސްޓެންޓް ސްޓީވް ހޮލަންޑް އަކީ ވެސް ޗެލްސީގެ ކޯޗުކަން ހުށަހެޅުން ގާތް މީހެއްކަމަށް ބެލެވެއެވެ. ނަމަވެސް ސައުތްގޭޓް ބުނީ ހޮލަންޑް އޭނާއާއެކު އިނގިރޭސި ޓީމުގައި ހުންނާނެ ކަމަށް ޔަގީންކުރާ ކަމަށެވެ. އޭނާ ބުނީ ނޭޝަންސް ލީގުގެ ސެމީ ފައިނަލުން ކެޓުމަކީ މުޅީން މާޔޫސްވާންވީ ސަބަބެއްނޫން ކަމަށެވެ. ސަބަބަކީ އިނގިރޭސި ޓީމުގެ ކުރިމަގު އުޖާލާވާނެކަމުގެ ޔަގީންކަން އޮތުންކަމަށެވެ.