ފުޓްބޯޅައިގައި އަދިވެސް ކުރިއަށް ދެވިދާނެ ކަމަށާއި އުމުރުން 34 އަހަރުގައި އެންމެ މަތީ ފެންވަރުގައި ކުޅެވެނީ ވިސްނުން ބަހައްޓާ ގޮތުން ކަމަށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފިއެވެ.
އޭނާ މިހެން ބުނީ ނޭޝަންސް ލީގުގެ ފައިނަލުގައި ނެދަލޭންޑްސްއާ ދެކޮޅަށް ކުޅޭ މެޗުގެ ކުރިން. ޕޯޗުގަލް ފައިނަލަށް ދިޔައީ ސްވިޒަލޭންޑް އަތުން 3-1އިން މޮޅުވެގެންނެވެ. މި މެޗުގައި ޕޯޗުގަލްގެ ތިން ލަނޑު ވެސް ޖެހީ ރޮނާލްޑޯއެވެ.
އޭނާ ބުނީ ގައުމީ ޓީމަށާއި ފުޓްބޯޅަ އަށް އަދިވެސް އޭނާގެ ފުށުން ގެނެސްދެވޭނެ ކުރިއެރުންތައް އެބަހުރި ކަމަށް. ރޮނާލްޑޯ ބުނީ އެންމެ މުހިންމު ކަމަކީ ތިމާގެ ވިސްނުންކަމަށެވެ. ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް ފަސް ފަހަރު ހޯދާފައިވާ ރޮނާލްޑޯ ބުނީ އޭނާ ދެކޭ ގޮތުގައި 34 އަހަރުވިޔަސް އަދިވެސް ފުޓްބޯޅައިގައި ކަންތައްތަކެއް ކުރެވިދާނެކަމަށެވެ.
އޭނާ ބުނީ ނޭޝަންސް ލީގުގެ ފައިނަލަކީ ޕޯޗުގަލް އަށް ވަރަށް މުހިންމު މުބާރާތެއް ކަމަށާއި ތަށި ހޯދަން ހުރިހާ ކުޅުންތެރިން ވެސް ތައްޔާރު ކަމަށެވެ.