ޚާއްސަ އެހީއަށް ބޭނުންވާ ދަރިވަރުންނަށް ޕޮލިޓެކްނިކްގެ ކޯސްތަކުގައި ބައިވެރިވުމުގެ ފުރުޞަތު ފަހިވެ، އެންރޯލްވާ ދަރިވަރުންގެ ޢަދަދު އިތުރުވުކަމީ އުފަލެއްކަމަށް މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހީމް ޙަސަން ވިދާޅުވެއްޖެއެވެ.
ޕޮލިޓެކްނިކްގެ މިއަހަރުގެ ޖޫންމަހުގެ އިންޓޭކްގެ އޮރިއެންޓޭޝަން ޕްރޮގްރާމްގައި ވާހަކަފުޅު ދައްކަވަމުން މިނިސްޓަރ ވިދާޅުވީ މޯލްޑިވްސް ޕޮލިޓެކްނިކުގެ ރޯލް ފުޅާކުރުމަކީ މުހިއްމުކަމެއްކަމަށެވެ. އަދި ޚާއްޞަ އެހީއަށް ބޭނުންވާ ދަރިވަރުންނަށް މިފަދަ ފުރުޞަތުތަކެއް ފަހިވުމަކީ އުފާކުރަންޖެހޭ ކަމެއްކަމަށްވެސް މިނިސްޓަރ ވިދާޅުވިއެވެ.
ޕޮލިޓެކްނިކުގައި އަޑުއިވުމުން މަހުރޫމްވެފައިވާ ފަރާތްތަކަށް ޚާއްޞަކޮށްގެން މުޅިން އަލަށް ފެށި ޕްރޮގްރާމްގައި 12 ދަރިވަރުން ވަނީ ބައިވެރިވެފައެވެ. އަދި ޕޮލިޓެކްނިކްގައި މިސެމިސްޓާގައި ބައިވެރިވި ދަރިވަރުންގެ ޢަދަދު ކުރީގެ ސެމިސްޓަރ ތަކަށްވުރެ 75 އިންސައްތަ އިތުރުވެފައިވާކަމަށް ޕޮލިޓެކްނިކުން މައުލޫމާތުދެއެވެ. އެގޮތުން 22 ޕްރޮގްރާމެއްގައި 500 ކުދިން މިސެމިސްޓަރގައި ކިޔަވަންފަށާނެކަމަށް ޕޮލިޓެކްނިކުން ބުނެއެވެ.
ޕޮލިޓެކްނިކްގެ އޮރިއެންޓޭޝަން ޕްރޮގްރާމްގައިވަނީ ކިވެޔުމާއިގުޅޭ މަޢުލޫމާތާއި ސަމާލުކަންދޭންވީ ކަންކަމާއި ގުޅޭ މަޢުލޫމާތު ދަރިވަރުންނަށް ސާފުކޮށްދީފައެވެ.
މޯލްޑިވްސް ޕޮލިޓެކްނިކްގައި އަންނަނީ އެކި ދާއިރަތަކުން ޓެކްނިކަލް ލެވެލްގެ ކޯސްތައް ހިނގަމުންނެވެ. އަދި އަހަރުން އަހަރަށް ޕޮލިޓެކްނިކްގެ ސްޓޭންޑަރޑް މަތިކޮށް އެތަނުން ނިކުންނަނީ ހަރުދަނާ މަސައްކަތްތެރިންނަށް ހެދުމަށް މޯލްޑިވްސް ޕޮލިޓެކްނިކުން އަންނަނީ މަސައްކަތްކުރަމުންނެވެ.