އިންތިޚާބީކަންކަން ހަރުދަނާކުރުމަށް ދުނިޔޭގައި ބާއްވާ އެންމެ ބޮޑު ސިމްޕޯޒިއަމް އަންނަ މަހު ރާއްޖޭގައި ބޭއްވުމުގެ މަސައްކަތް އިލެކްޝަންސް ކޮމިޝަނުންކުރަމުން އަންނަކަމަށް އެކޮމިޝަނުން ހާމަކުރައްވައިފިއެވެ.
18ވަނަ އިންޓަނޭޝަނަލް ސެންޓަރ ފޮރ ޕާލިމެންޓަރީ ސްޓަޑީސްއަކީ އިންތިޚާބީ ކަންކަމުގައި ދިމާވާ މައްސަލަތަކާއި އިންތިޚާބުތައް ބޭއްވުމުގައި ޤައުމުތަކަށް ދިމަވާ ގޮންޖެހުންތަކާއި މެދު މަޝްވަރާކުރުމަށް ބާއްވާ ސިމްޕޯޒިއަމެކެވެ.
ދުނިޔޭގެ ބޮޑެތި ޤައުމުތަކުން ބައިވެރިވާ މިސިމްޕޯޒިއަމް ރާއްޖޭގައި އޮންނާނީ އަންނަ މަހުގެ 4އިން 6އަށް ބަނޑޮސް އައިލެންޑް ރިސޯޓާއި ޕެރަޑައިސް އައިލެންޑް ރިސޯޓުގައިކަމަށް އިލެކްޝަންސް ކޮމިޝަނުން ވިދާޅުވެއެވެ. ސާޅީސް ހަ ޤައުމަކުން ސަތޭކަ ހަތަރު ފަރާތެއް މި ސިމްޕޯޒިއަމްގައި ބައިވެރިވުމަށް މިހާތަނަށް ހުށައަޅާފައިވާކަމަށް އިލެކްޝަންސް ކޮމިޝަނުން ވިދާޅުވެއެވެ. މީގެ ތެރޭގައި ޤައުމުތަކުގެ އިލެކްޝަންސް ކޮމިޝަންތަކާއި އިންތިޚާބުތަކާއި ގުޅުންހުރި ފަރާތްތައް ހިމެނޭކަމަށްވެސް އެކޮމިޝަނުން ވިދާޅުވެއެވެ.
އެކި މަޢުޟޫތަކަށް މަޝްވަރާކުރުމަށް ހުޅުވާލައިގެން ބާއްވާ މި ސިމްޕޯޒިއަމްގައި ޒުވާނުންނަށް ސިޔާސީ މައިދާނުގައި ހުރި ދަތިތަކާއި ގުޅޭގޮތުން މަޝްވަރާކުރުމަށް ހަމަޖެހިފައިވާކަމަށް އިލެކްޝަންސް ކޮމިޝަނުން ވިދާޅުވެއެވެ.
އިންޓަނޭޝަނަލް ސެންޓަރ ފޮރ ޕާލިމެންޓަރީ ސްޓަޑީސްގެ މިއަހަރު ރާއްޖޭގައި ބޭއްވުމަށް ނިންމާފައިވާއިރު މިއީ މިކޮންފަރެންސް ބާއްވާ އަށާރަވަނަ އަހަރެވެ.