އާޖެންޓީނާގެ ކެޕްޓަން ލަޔޮނަލް މެސީ ތިން މަސް ދުވަހަށް ސަސްޕެންޑްކޮށް 50000 ޕައުންޑުން ޖޫރިމަނާ ކޮށްފި އެވެ.
ދެކުނު އެމެރިކާ ފުޓްބޯޅަ ފެޑަރޭޝަނުން މި ގޮތަށް ނިންމީ މިދިޔަ މަހު ނިމުނު ކޮޕާ އެމެރިކާ ފުޓްބޯޅަ މުބާރާތުގައި މެސީ ދެއްކި ވާހަކަތަކުގެ ސަބަބުންނެވެ.
މުބާރާތުގެ ސެމީ ފައިނަލުގައި ބްރެޒިލް އަތުން ބަލިވި މެޗާއި ތިން ވަނަ ހޮވަން ޗިލީ އަތުން މޮޅުވި މެޗަށް ފަހު މެސީ ވަނީ މުބާރާތުގެ އިންތިޒާމްތަކަށާއި ރެފްރީންނަށް ވަރަށް ބޮޑަށް ފާޑުކިޔައިފަ އެވެ. ޗިލީ މެޗުގައި އޭނާ އަށް ދެއްކި ރަތްކާޑަށް ފަހު މެސީ ބުނީ މުބާރާތުގައި ކޮރަޕްޝަން ހިމެނޭ ކަމަށާއި އެކަމާ ދުރުވާން ޖެހޭ ކަމަށެވެ.
މި ސަސްޕެންޝަނުގެ ސަބަބުން މެސީ އަށް ގެއްލޭނީ މުޅިން ވެސް ރަހުމަތްތެރިކަމުގެ މެޗުތަކެވެ. މިހެންވެ ދެކުނު އެމެރިކާގެ ގައުމުތަކުން ވޯލްޑް ކަޕް ކޮލިފައިންގައި ކުޅޭ މެޗުތަކަށް މެސީ އަށް ތައްޔާރުވެވޭނެ އެވެ. ނަމަވެސް ޗިލީ މެޗުގައި ދެއްކި ރަތްކާޑުގެ ސަބަބުން ކޮލިފައިންގެ ފުރަތަމަ މެޗުގައި އޭނާ އަށް ނުކުޅެވޭނެ އެވެ.
ސްޕެއިންގެ ބާސެލޯނާއަށް ކުޅެމުން އަންނަ އުމުރުން 32 އަހަރުގެ މެސީ ކޮށްފައިވާ ތުހުމަތުތަކަށް ރައްދުދެމުން ދެކުނު އެމެރިކާ ސަރަހައްދުގެ ފުޓްބޯޅަ ފެޑެރޭޝަނުން ކުރިން ބުނެފައިވަނީ އެ ވާހަކަތަކަކީ އެއްވެސް އަސާސެއްގެ މައްޗަށް ބިނާކޮށް ދައްކައިފައިވާ ވާހަކަތަކެއް ނޫން ކަމަށާއި އަދި އެއީ ފެޑެރޭޝަންގެ އަގުވައްޓާލުމުގެ ގޮތުން ކޮށްފައިވާ ތުހުމަތުތަކެއް ކަމަށެވެ.