މެންޗެސްޓާ ސިޓީން ކުޅުންތެރިން ގަތުމަށް ކުރާ ހަރަދާ އެއްވަރަށް ލިވަޕޫލަށް ހަރަދު ނުކުރެވޭނެ ކަމަށާއި ސިޓީން ކުރާ ހަރަދާމެޗު ޖެހިލުންވާ ކަމަށް ލިވަޕޫލްގެ ކޯޗު ޔާގެން ކްލޮޕް ބުނުމުން ސިޓީން ރައްދުދީފި އެވެ.
މި ދެ ޓީމު އިނގިރޭސި ސީޒަން ހުޅުވަން މާދަމާ ކުޅޭ ކޮމިއުނިޓީ ޝީލްޑް މެޗުގެ ކުރިން ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނީ އޭނާގެ ޓީމަކީ ކޮންމެ ސީޒަނެއް ފެށުމުގެ ކުރިން 200 މިލިއަން ޕައުންޑް ހަރަދުކުރާ ޓީމެއް ނޫން ކަމަށެވެ.
"ލިވަޕޫލްއިން ވަނީ އެވަރަށް މިދިޔަ ސީޒަނުގައި ހަރަދުކޮށްފައި. މިފަހަރު އެމީހުން އެވަރަށް ހަރަދެއް ނުކުރޭ. ސަބަބަކީ އެއީ ކޮންމެ ސީޒަނެއްގައި ކުރެވޭނެ ކަމަކަށްނުވާތީވެ. ހަމައެގޮތަށް ސިޓީން ވެސް އެބުނާ ވަރަށް ހަރަދެއް ނުކުރޭ،" ގާޑިއޯލާ ބުންޏެވެ.
އޭނާ ބުނީ މީގެ ތިން އަހަރު ކުރިން ސިޓީއާ ހަވާލުވެ އޭނާ 300 މިލިއަން ޕައުންޑް ހަރަދުކުރީ ސަބަބުތަކެއް އޮވެގެން ކަމަށެވެ. އެއީ 30 އަހަރުން މަތީގެ 10 ނުވަތަ 11 ކުޅުންތެރިން ތިބުމުން ޓީމު ޒުވާން ކުރަން މަޖުބޫރު ވުމާއި އޭނާ ބޭނުންވާ ކުޅުންތެރިން ހޯދަން ޖެހުމުން ކަމަށެވެ.
"އެކަމަކު މި ސީޒަނުގައި އަހަރުމެން ގެނައީ އެންމެ ކުޅުންތެރިއެއް. އެހެންވީމާ ކްލޮޕް އެބުނާ ވާހަކަ އަކީ ދޮގެއް،" ގާޑިއޯލާ ބުންޏެވެ.
މިދިޔަ ސީޒަނުގައި އިނގިރޭސި ލީގު ސިޓީ ހޯދީ ލިވަޕޫލަށްވުރެ އެންމެ ޕޮއިންޓެއް ގިނަވުމުންނެވެ. އަދި އިނގިރޭސި ލީގުގެ ތިން ތައްޓާއެކު ކޮމިއުނިޓީ ޝީލްޑް ހޯދީ ސިޓީ އެވެ. ލިވަޕޫލް ކާމިޔާބުކުރީ ޗެމްޕިއަންސް ލީގެވެ. މިހެންވެ އިނގިރޭސި އެންމެ ކާމިޔާބު ދެ ޓީމުގެ މި ސީޒަނުގެ ފުރަތަމަ މެޗު ވަރަށް ވާދަވެރިވާނެ ކަމަށް ދެކޭ މީހުން ގިނަ އެވެ.