ދުނިޔޭގެ އެންމެ މޮޅު ކުޅުންތެރިޔާ ހޮވަން ނަގާފައިވާ ގަދަ 10 ކުޅުންތެރިންނާމެދު މެންޗެސްޓާ ސިޓީގެ ކޯޗު ޕެޕް ގާޑިއޯލާ ހިތްހަމަ ނުޖެހުން ފާޅުކޮށްފި އެވެ.
އޭނާ ބުނީ އެހެން އެއްވެސް ކުޅުންތެރިއަކަށްވުރެ އޭނާގެ ޓީމުގެ ބެނާޑޯ ސިލްވާ މިދިޔަ ސީޒަނުގައި ދެއްކީ މޮޅު ކުޅުމެއް ކަމަށެވެ.
"އެކަމަކު އަހަންނަށް އެނގޭ ގިނަ ފަހަރު ނޮމިނޭޓްވަނީ ޗެމްޕިއަންސް ލީގު ހޯދާ ކުޅުންތެރިންކަން. އެކަމަކު މޮޅަށް ކުޅޭ ކުޅުންތެރިންގެ އަގު ވަޒަން ކުރަންޖެހޭ،" ގާޑިއޯލާ ބުންޏެވެ.
މިފަހަރުގެ ގަދަ 10ގައި ސިޓީއާ އެންމެ ވާދަވެރި ލިވަޕޫލްގެ ތިން ކުޅުންތެރިން ހިމެނެ އެވެ. އެއީ ޑިފެންޑަސރު ވާޖިލް ވެންޑައިކާއި ސާދިއޯ މާނޭ އާއި އަލިސަން ބެކާ އެވެ.
ގާޑިއޯލާ ބުނީ ސިޓީއަކީ އެހެން ޓީމުތަކާއަޅާ ބަލާއިރު ތާރީހު ބަލިކަށި ޓީމެއް ކަމަށާއި އެއީ ވެސް ބައެއް ފަހަރު ލިބޭ ޑިސްއެޑްވާންޓޭޖެއް ކަމަށެވެ.