ސްޕެނިޝް ލީގުގެ ފުރަތަމަ މެޗުގައި އެތްލެޓިކް ބިލްބާއޯ އަތުން ޗެމްޕިއަން ބާސެލޯނާ 1-0އިން ބަލިވެއްޖެއެވެ.
މެޗުގެ ހަމައެކަނި ލަނޑުޖެހީ މެޗު ނިމެން މިނިޓަކަށްވެފައިވަނިކޮށް ބިލްބާއޯގެ 38 އަހަރުގެ ފޯވަޑް އަދޫރިޒްއެވެ. މި މެޗުގައި ރަފީނިއާ އާއި ލުއިސް ސުއަރޭޒް ފޮނުވާލި ހަމަލާތައް ދަނޑީގައި ޖެހުނުއިރު މެޗުގެ ފުރަތަމަ ހާފުގައި ލިބުނު އަނިޔާގެ ސަބަބުން ސުއަރޭޒް ވަނީ ދަނޑުން ބާލައިފައެވެ.
މި މެޗުގައި 107 މިލިއަން ޔޫރޯ އަށް ބާސެލޯނާ އަށް މި ސީޒަނުގައި ގެނައި ފޯވަޑް އޮންޓުއާން ގްރީޒްމަން ރަނގަޅު ކުޅުމެއް ދެއްކި ނަމަވެސް އޭނާ އަށް ގޯލެއް ޖެހޭވަރެއްނުވިއެވެ.
މެޗަށް ފަހު އަދޫރިޒް ބުނީ ބާސެލޯނާ އަކީ ލީގުގެ އެންމެ ވަރުގަދަ އެއް ޓީމު ކަމަށާއި އެޓީމާ ދެކޮޅަށް ލިބޭނީ މަދު ފުރުސަތެއް ކަމަށެވެ. އަދި ފުޓްބޯޅައިގެ އެންމެ ރީތިކަމަކީ ލިބޭ މަދު ފުރުސަތުތަކުގެ ބޭނުންކޮށްގެން ފަހުވަގުތު މޮޅުވުން ކަމަށެވެ.
ބާސެލޯނާގެ ކެޕްޓަންކަން މި މެޗުގައި ކުރީ ޑިފެންޑަރު ޖެރާޑް ޕީކޭއެވެ. އެއީ އަނިޔާގެ ސަބަބުން ކެޕްޓަން ލަޔޮނަލް މެސީ އާއި ވައިސް ކެޕްޓަން ސާޖިއޯ ބުސްކެޓްސް މި މެޗުގައި ނުކުޅޭތީއެވެ. ޕީކޭ މެޗަށް ފަހު ބުނީ ބިލްބާއޯގެ ދަނޑަކީ އަބަދުވެސް އުނދަގޫ ދަނޑެއް ކަމަށާއި ބާސެލޯނާ އާއްމުކޮށް ކުޅޭ ފެންވަރުގައި މި މެޗުގައި ނުކުޅެވުނު ކަމަށެވެ.