ޔޫއޭފާއިން ހޮވާ ޔޫރަޕުގެ އެންމެ މޮޅު ކުޅުންތެރިޔާގެ މާކްސްތައް ލީކުވެއްޖެއެވެ.
މި މަގާމަށް ވާދަކުރަނީ ބާސެލޯނާގެ ކެޕްޓަން ލަޔޮނަލް މެސީ އާއި ލިވަޕޫލްގެ ޑިފެންޑަރު ވާޖިލް ވެންޑައިކާއި ޔުވެންޓަސްގެ ފޯވަޑް ކްރިސްޓިއާނޯ ރޮނާލްޑޯއެވެ.
މީގެ ތެރެއިން ޗެމްޕިއަންސް ލީގު ކާމިޔާބުކުރީ ލިވަޕޫލްކަމުން އިނާމް ލިބުން އެންމެ ގާތީ ވެންޑައިކަށް ކަމަށް ވަނީ ބެލެވިފައެވެ. ނަމަވެސް ލީކުވެފައިވާ މާކްސްތަކުގައިވާ ގޮތުން އެވޯޑް ލިބެނީ މެސީ އަށެވެ.
އޭނާއަށް 252 އަށްވުރެ ގިނަ މާކްސް ލިބިފައިވާއިރު ދެވަނަ އަށްދާ ވެންޑައިކަށް ލިބެނީ 224 މާކްސްއެވެ. ރޮނާލްޑޯ އަށް ލިބެނީ ތިން ވަނައެވެ. މިކަމާ ބެހޭ ގޮތުން ޔޫއޭފާއިން އަދި އެއްވެސް އެއްޗެއް ބުނެފައެއްނުވއެވެ.
މެސީ އަކީ ނިމިދިޔަ ޗެމްޕިއަންސް ލީގުގެ އެންމެ ގިނަ ގޯލު ޖެހި ކުޅުންތެރިޔާއެވެ. އަދި ލަލީގާގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމާއިއެކު ޔޫރަޕްގެ ރަން ބޫޓުވެސް ލިބުނީ މެސީއަށެވެ. އޭނާގެ ޓީމު މުބާރާތުން ކެޓީ ސެމީ ފައިނަލުގައި ޗެމްޕިއަން ލިވަޕޫލް އަތުންނެވެ.