ގެރެތް ބޭލް އާއި ހާމޭސް ރޮޑްރިގޭޒަށް ރެއާލް މެޑްރިޑުގެ ޓީމުން ފުރުސަތު ލިބޭނެ ކަމަށް ކޯޗު ޒައިނުއްދީން ޒިދާން ބުނެފިއެވެ.
އޭނާ މިހެން ބުނީ މި ދެ ކުޅުންތެރިން ވިއްކާލަން މިހާތަނަށް ކުރި މަސައްކަތް ނާކާމިޔާބުވެފައިވަނިކޮށެވެ.
ޒިދާން ބުނީ މިހާރު ދެ ކުޅުންތެރިން ވެސް ވިސްނަނީ މި ސީޒަނުގައި ރެއާލް މެޑްރިޑަށް ކާމިޔާބު ހޯދައިދޭން ކަމަށެވެ. އަދި ރޭ ސެލްޓްވީގޯ އަތުން 3-1އިން ރެއާލް މޮޅުވި މެޗުގެ ކުރިން އޭނާ މި ދެ ކުޅުންތެރިންނާ ދެތިން ފަހަރު ބައްދަލުކޮށް މަޝްވަރާކޮށްފައިވާނެ ކަމަށްވެސް ޒިދާން ބުންޏެވެ.
ރެއާލް އަށް މި ދެ ކުޅުންތެރިން ވިއްކާނުލެވުނީ އެމީހުން ވިއްކަން ރެއާލް ކިޔާ އަގު ބޮޑުވުމާއި މި ދެ ކުޅުންތެރިންގެ މުސާރަ ދެވޭނެ މަދުކުލަބުތަކުން ބޮޑުގައި ކުޅުންތެރިން ގަންނަން ބޭނުންނުވުމުންނެވެ.
ރޭގެ މެޗުގައި ބޭލް ފުރަތަމަ އެގާރައިގައި ކުޅުނުއިރު، މެޗުގައި ރެއާލްއިން ޖެހި ފުރަތަމަ ގޯލް ޖަހަން އެހީތެރިވި ކުޅުންތެރިޔަކީވެސް ބޭލްއެވެ.