ބިމުގެ ބޮޑުމިނަށް ބަލާފައި މާލޭގައި އިމާރާތްތައް އުސް ކުރެވޭނެވަރު ކަނޑައަޅާ ގޮތަށް އިމާރާތް ކުރުމާ ބެހޭ ގަވައިދަށް އިސްލާހު ގެންނަން ނިންމައިފިއެވެ.ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވީ، މިހާރު ގަވައިދަށް ގެންނަ އިސްލާހަކީ، ގަވައިދުގައި 10 ބުރިއަށް އަދި ފަނަރަ ބުރިއަށް ނެގުމަށް އޮންނަ ފޯމިއުލާ ބޭނުން ކޮށްގެން 12 ބުރިއަށް ނުވަތަ 13 ބުރިއަށް އިމާރަތްތައް އުސް ކުރެވޭ ގޮތަށް ގެންނަ އިސްލާހެއް ކަމަށެވެ.ހައުސިން މިނިސްޓަރ ވިދާޅުވީ، މާލޭގެ ބިމުގެ ބޭނުން އެންމެ ފުރިހަމަ ގޮތުގައި ކުރުމަށް، މާލޭގައިހުރި 4000 އަކަފޫޓުގެ ބިންތައް 20 ބުރިއަށް ނެގުމުގެ ހުއްދަ ދިނުމަށް ނިންމާފައިވާ ކަމަށެވެ.ވިހި ބުރިއަށް ނެގުމަށް ހުއްދަ ދޭއިރު އެއިމާރާތެއްގެ ޕާކިންއަށް، ބިމުން އަޑިއަށް އެއްބުރި ހެދުމަށްވެސް ފުރުސަތު އޮންނާނެ ކަމަށް މިނިސްޓަރ ވިދާޅުވިއެވެ. މީގެ ކުރިން މާލޭގައި އެންމެ އުސްކޮށް އިމާރާތް ކުރުމަށް ހުއްދަ ދެނީ 15 ބުރިއަށެވެ.