''އައިއެސްއޯ މިންގަނޑަށް ޕާސްޕޯޓުގެ ހުރިހާ ޚިދުމަތެއް ފެއްތުމަށް މިޑިކުއިޕް ޕްރައިވެޓް ލިމިޓެޑާ ހަވާލުކޮށްފިއެވެ.އައިއެސްއޯ މިންގަނޑަށް ފެއްތުމަށް މެޑިކުއިޕާ ހަވާލުކުރުމަށް އިމިގްރޭޝަންގެ މައި އޮފީހުގައި ބޭއްވި ރަސްމިއްޔާތުގައި، އިމިގްރޭޝަންގެ ފަރާތުން އެއްބަސްވުމުގައި ސޮއި ކުރެއްވީ، އިމިގްރޭޝަންގެ ކޮންޓްރޯލާރ މުހައްމަދު އަންވަރުއެވެ.މިޑިކުއިޕްގެ ފަރާތުން ސޮއި ކުރެއްވީ، އެ ކުންފުނީގެ މެނޭޖިން ޑިރެކްޓަރ މުހައްމަދު މުފީދުއެވެ.އިމިގްރޭޝަނުން ދޫކުރާ ޕާސްޕޯޓުގެ ޚިދުމަތް އައިއެސްއޯ މިންގަނޑަށް ފައްތައި، އެކަމުގެ ސެޓްފިކެޓް އިމިގްރޭޝަނަށް ހޯދައިދިނުމަށް މެޑިކްއިޕް ޕްރައިވެޓް ލިމިޓެޑުން މަސައްކަތްކުރާނީ، އިންޑިއާގެ ލަކްޝީ މެނޭޖްމަންޓް ކޮންސަލްޓަންޓްސް ޕްރައިވެޓް ލިމިޓެޑާއި ގުޅިގެން ކަމަށް އިމިގްރޭޝަނުން މައުލޫމާތުދެއެވެ.އެއްބަސްވުމުގައި ސޮއިކުރެއްވުމަށްފަހު ވާހަކަފުޅު ދައްކަވަމުން އިމިގްރޭޝަންގެ ކޮންޓްރޯލަރ މުހައްމަދު އަންވަރު ވިދާޅުވީ، އައިއެސްއޯގެ މިންގަޑަށް ޚިދުމަތުގެ ފެންވަރު މަތިކޮށް އައި.އެސް.އޯ ސަރޓިފިކޭޝަން ހޯދުމުގެ ބޭނުމަކީ ޕާސްޕޯޓްގެ ޚިދުމަތުގެ ފެންވަރު މަތިކޮށް އެއްފެންވަރެއްގައި ދެމެހެއްޓުން ކަމަށެވެ. އަދި މިހާރުވެސް އިމިގްރޭޝަނުން ދެމުންދާ ޚިދުމަތުގެ ފެންވަރު ރަނގަޅު ކުރުމަށް މަސައްކަތް ކުރަމުންދާކަން ފާހަގަ ކުރައްވަމުން ކޮންޓްރޯލަރ ވިދާޅުވީ، ކައިރި މުސްތަޤްބަލެއްގައި ޕާޓްނަރ އެޖެންސީތައް މެދުވެރިކޮށް އޮންލައިންކޮށް އެޕްލިކޭޝަން ހުށަހެޅޭނެ އިންތިޒާމް ހަމަޖެހިގެންދާނެކަމަށެވެ.ޕާސްޕޯޓްގެ ޚިދުމަތްއޮންލައިން ކުރުމަށް ޕާސްޕޯޓް ދޫކުރުމަށް ބޭނުންކުރާ ސޮފްޓްވެއަރގެ ސެކިއުރިޓީ ދާދި ފަހުން ވަރުގަދަކޮށްފައިވާ ކަމަށްވެސް ކޮންޓްރޯލަރ ވިދާޅުވިއެވެ.އައިއެސްއޯ ސެޓިފިކެޓް ހޯދުމަށް ހަވާލުކުރި މިޑިކްއިޕް ޕްރައިވެޓް ލިމިޓެޑަކީ ރާއްޖޭގެ ގިނަ ކުންފުނިތަކަށާއި ރިޒޯޓްތަކަށް އައި.އެސް.އޯ ސަރޓިފިކޭޝަން ހޯދުމުގެ މަސައްކަތް ކޮށްދީފައިވާ ފަރާތެކެވެ.