ސެމްސަންގުން ތަރައްޤީކޮށްފައިވާ ފަތްޖަހާލެވޭ "ޖެލެކްސީ ފޯލްޑް" ފޯނު އަންނަ ހުކުރުދުވަހު ލޯންޗުކުރުމަށް ނިންމައިފިއެވެ.
ޚަބަރުތައް ބުނާގޮތުން ގެލެކްސީ ފޯލްޑް ހުކުރު ދުވަހު ލޯންޗުކުރާނީ ޖަރުމަންވިލާތުގައި އެދުވަހު ފަށާ ޓެކްނޮލެޖީ ފެއަރއެއްކަމަށްވާ، އައި.އެފް.އޭ ޓްރޭޑް ޝޯވގެ ތެރެއިންނެވެ. މީގެ ކުރިން ސެމްސަންގުންވެސް ވަނީ ސެޕްޓެމްބަރުމަހުގެ ތެރޭގައި ގެލެކްސީ ފޯލްޑް ލޯންޗުކުރާނެކަން ހާމަކޮށްފައެވެ. ނަމަވެސް ވަކި ތާރީޚެއް ސެމްސަންގުން ހާމަކޮށްފައެއް ނުވެއެވެ.
ސެމްސަންގުން ތަރައްޤީކުރީ ގެލެކްސީ ފޯލްޑް އެންމެ ފުރަތަމަ ލޯންޗުކޮށްފައިވަނީ މިދިޔަ އޭޕްރީލްމަހުގެ ތެރޭގައެވެ. އަދި އެދުވަސްވަރު ޕްރީ އޯޑަރއަށްވެސް ހުޅުވާލިއެވެ. ނަމަވެސް ފޯނުގައި ހުރި މައްސަލަތަކެއް ފާހަގަވަމުން ސެމްސަންގުން ވަނީ ފޯނު ބާޒާރަށް ނެރުން ފަސްކޮށްފައެވެ.
ޚަބަރުތައް ބުނާގޮތުން ސެމްސަންގުން ދެވަަނަ ފަހަރަށް ގެލެކްސީ ފޯލްޑް ލޯންޗުކުރަނީ ފޯނުން ފާހަގަވި ހުރިހާ މައްސަލަތަކެއް ހައްލުކުރުމަށްފަހުއެވެ.
ގެލެކްސީ ފޯލްޑްއަކީ އޭގެ އަސްލު ބައްޓަމުގައި 4.6 އިންޗީގެ ސްކްރީނެއް ހުންނަ ފޯނެއްނަމަވެސް، ފޮތެއްހެން ހުޅުވާލެވޭ މިފޯނު ހުޅުވާލުމުން 7.3 އިންޗިއަށް ސްކްރީން ބޮޑުވެގެންދެއެވެ. މިފޯނަކީ ބޮޑެތި ސްކްރީންތައް ހިމެނޭ ސްމާޓްފޯނު ގެންގުޅެން ބޭނުންވާ ފަރާތްތަކަށް ވަރަށް ބޮޑަށް ކަމުދާނެ ފޯނެއްކަމަށް ސެމްސަންގުން ބުނެއެވެ. ބޮޑު ސްކްރީނެއް މިފޯނުގައި ހުންނައިރު، އެއް ފަހަރާ ގިނަ ކަންތައްތަކެއްވެސް މިފޯނުން ކުރެވޭނެއެވެ. މިސާލަކަށް ނެޓްފިލިކްސްއިން ފިލްމެއް ބަލާލަމުން، ގޫގުލްއިން އެއްޗެއް ސާރޗްކުރަމުން، ރަށްޓެއްސަކަށް މެސެޖެއްކޮށްލުމަކީ މިފޯނުން ވަރަށް ފަސޭޙަކަމެކެވެ.
ސެމްސަންގުން ތަރައްޤީކޮށްފައިވާ ގެލެކްސީ ފޯލްޑް ހަތަރު ކުލައެއްގައި ލިބެން ހުންނާނެއެވެ. އެއީ ކަޅު، ނޫ، ފެހި އަދި ސިލްވަރ ކުލައެވެ. މިފޯނުގެ 4ޖީ އަދި 5ޖީ މޮޑެލްވެސް ވަނީ ތަރައްޤީކޮށްފައެވެ.
ސެމްސަންގުން ފަތްޖަހާލެވޭ ފޯނެއް ތަރައްޤީކޮށްފައިވާއިރު ސްމާޓް ފޯނު ވިޔަފާރީގައި ހަރަކާތްތެރިވާ އެހެން ކުންފުނިތަކުންވެސް ދަނީ ފަތްޖަހާލެވޭ ފޯނުތައް ތަރައްޤީކުރަމުންނެވެ. އެގޮތުން ސެމްސަންގަށްފަހު ފަތްޖަހާލެވޭ ފޯނެއް ބާޒާރަށް އެންމެ އަވަހަށް ނެރޭނީ ވާވޭއިންކަމަށްވެސް ޚަބަރުތައް ބުނެއެވެ.