ޓެކްސް ނެގުމާބެހޭ އިދާރީ ޤާނޫނަށް ގެނައި އިސްލާހާއެކު ޓެކްސް ނިޒާމް ހަރުދަނާވެގެންދާނެކަމަށް އިކޮނޮމިކް މިނިސްޓަރ ފައްުޔާސް އިސްމާއިލް ވިދާޅުވެއްޖެއެވެ.
އިކޮނޮމިކް މިނިސްޓަރ މިހެން ވިދާޅުވީ، ޓެކްސް ނެގުމާބެހޭ އިދާރީ ޤާނޫނަށް ސަރުކާރުން ހުށަހެޅުއްވި އިސްލާހުތައް ރައްޔިތުންގެ މަޖިލީހުން ފާސްކުރެއްވުމާ ގުޅިގެނެވެ.
އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ، ޓެކްސް ނެގުމާބެހޭ އިދާރީ ޤާނޫނަށް ގެނައި އިސްލާހުތަކުގެ ސަބަބުން ހަރުދަނާ އަދި ދެ ފުށް ފެންނަ ޓެކްސް ނިޒާމަކަށް ދިއުމަށް މަގުފަހިވެގެންދާނެކަމަށެވެ.
ރައްޔިތުންގެ މަޖިލީހުން އިއްޔެ ފާސްކުރި ޓެކްސް ނެގުމާބެހޭ އިދާރީ ޤާނޫނަށް ގެނައި އިސްލާހު އޮތް ގޮތުން، އެ އިސްލާހު ތަސްދީޤްކުރުމުން ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު މުޙައްމަދުގެ މަޤާމު ގެއްލޭނެއެވެ.
ޓެކްސް ނެގުމާބެހޭ އިދާރީ ޤާނޫނަށް މަޖިލީހުން ގެނައި އިޞްލާހުގައި ބުނެފައިވަނީ މީރާގެ ބޯޑު އެކުލެވިގެން ވަނީ 7 މެމްބަރުންގެ މައްޗަށްކަމަށެވެ. އެއީ ފިނޭންސް މިނިސްޓަރ ކަނޑައަޅާ މީހަކާއި، ރައީސުލްޖުމްހޫރިއްޔާ އައްޔަން ކުރާ ފަސް މެމްބަރުންނާއި، ކޮމިޝަނަރ ޖެނެރަލް އޮފް ޓެކްސޭޝަންއެވެ.
މީރާގެ ބޯޑަށް މެންބަރުން އައްޔަންކުރެވޭނީ ރައްޔިތުންގެ މަޖިލީހުގެ ރުހުމާއެކުކަމަށްވެސް މިއަދު ފާސްކުރި އިޞްލާހުގައިވެއެވެ. އަދި މީރާގެ ބޯޑާއި ކޮމިޝަނަރު ޖެނެރަލް އޮފް ޓެކްސޭޝަންގެ މަޤާމަށް ބޭފުޅުން ޢައްޔަންކުރެވޭނީ ރައްޔިތުންގެ މަޖިލީހުން ރުހުން ދިނުމުންކަމަށްވެސް ބުނެފައިވެއެވެ.