ޗައިނާއާއި އެމެރިކާގެ ދެމެދުގައި ހިންގަމުންދާ ވިޔަފާރީގެ ހަނގުރާމައާ ގުޅޭގޮތުން މަޝްވަރާކުރުމަށް އަންނަމަހު ދެ ޤައުމުގެ އިސް އޮފިޝަލުންގެ މެދުގައި ބައްދަލުވުންތަކެއް ބޭއްވުމަށް ނިންމައިފިއެވެ.
އެމެރިކާއާއި ޗައިނާގެ އޮފިޝަލުން ވިޔަފާރީގެ މައްސަލަތަކާ ގުޅޭގޮތުން މަޝްވަރާކުރަން ނިންމާފައިވާކަން ޗައިނާގެ ކޮމާސް މިނިސްޓްރީން ހާމަކޮށްފައި މިވަނީ، އެ ދެޤައުމުގެ މެދުގައި ކުރިއަށްދާ ވިޔަފާރީގެ މައްސަލަތަކުގެ ސަބަބުން ދުނިޔޭގެ އިޤްތިޞާދަށް ބޮޑު ލޮޅުމެއް އައިސްދާނެކަމުގެ ބިރު ހީވެފައިވާ ދަނޑިވަޅެއްގައެވެ.
ޗައިނާގެ ކޮމާސް މިނިސްޓްރީން ބުނީ ވިޔަފާރީގެ މައްސަލަތަކާ ގުޅޭގޮތުން މަޝްވަރާކުރުމަށް ނިންމީ އެމެރިކާއާއި ޗައިނާގެ އިސްވެރިންގެ ބައްދަލުވުމަކަށްފަހުކަމަށެވެ. އެގޮތުން އެ ބައްދަލުވުމުގައި އެމެރިކާގެ ޓެރެޝަރީ ސެކްރެޓަރީއާއި، އެމެރިކާގެ ޓްރޭޑް ރެޕްރެޒެންޓޭޓިވް އަދި ޗައިނާގެ ވައިސް ޕްރިމިއަރ ބައިވެރިވެވަޑައިގަތްކަމަށް ޚަބަރުތައް ބުނެއެވެ. މިބައްދަލުވުމުގައި ދެ ފަރާތުންވެސް މަޝްވަރާކޮށް، ވާހަކަ ދައްކައިގެން ކަންކަމަށް އަމަލީ ސިފަ ގެނައުމުގެ މުހިއްމުކަމުގެ މައްޗަށް ވާހަކަ ދެއްކިކަމަށް ޚަބަރުތައް ބުނެއެވެ.
އޮކްޓޫބަރުމަހު ޗައިނާއާއި އެމެރިކާއާ ދެމެދު މަތީ ފަންތީގެ މަޝްވަރާތަކެއް ބޭއްވުމަށް ނިންމާފައިވާއިރު، އޭގެ ކުރިން މިމަހުގެ މެދު ތެރޭގައި ދެ ޤައުމުގެ އޮފިޝަލުންގެ މެދުގައި އިތުރު މަޝްވަރާތަކެއްވެސް ކުރިއަށްދާނެއެވެ. އަދި އެމަޝްވަރާތައް ކުރިއަށްދާނީ އެމެރިކާގައިކަމަށްވެސް ޚަބަރުތައް ބުނެއެވެ.
އެމެރިކާއާއި ޗައިނާއާ ދެމެދު ވިޔަފާރީގެ ހަނގުރާމައެއް ކުރިއަށްދާއިރު، އެއް ޤައުމުން ދަނީ އަނެއް ޤައުމަށް ވިޔަފާރީގައި ދަތިކުރުމަށް ގިނަ ފިޔަވަޅުތަކެއް އަޅަމުންނެވެ. އެގޮތުން އެއް ޤައުމުން އަނެއް ޤައުމަށް އެތެރެކުރާ މުދަލުން ނަގާ ޓެރިފް ނުވަތަ ޑިއުޓީތައް ދަނީ ދުވަހެއް ދުވަހަކުން ބޮޑުކުރަމުންނެވެ. މިކަމުގެ ސަބަބުން ދުނިޔޭގެ އިޤްތިޞާދަށް ވަރަށް ބޮޑު އަސަރެއް ކުރާނެކަމަށް މާލީ އިދާރާތަކުން ބުނެއެވެ.