މޯލްޑިވްސް ކެޕިޓަލް ޕްރޮވައިޑަރސް ސިމްޕޯސިއަމްގެ ނަމުގައި ޚާއްސަ ސިމްޕޯސިއަމެއް ބާއްވައިފިއެވެ.
ސޮނޭވާ ފުށީގައި ކުރިއަށްދިޔަ މިސިމްޕޯސިއަމްއަކީ އިންވެސްޓަރުން ރާއްޖޭގައި އިންވެސްޓްކުރުމާ ގުޅޭގޮތުން ބޭއްވި ސިމްޕޯސިއަމްއެކެވެ. މިސިމްޕޯސިއަމްގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި، ފިނޭންސް މިނިސްޓަރ އިބްރާހިމް އަމީރު އަދި ޓޫރިޒަމް މިނިސްޓަރ އަލީ ވަހީދުގެ އިތުރުން، މަޖިލީހުގެ މެމްބަރުންނާއި ސަރުކާރުގެ އިސްވެރިން ބައިވެރިވެވަޑައިގަތެވެ.
މިސިމްޕޯސިއަމްގައި ރާއްޖޭގައި މިވަގުތު އިންވެސްޓަރުންވީ ސަބަބުތަކާއި އެކަމުގެ މުހިއްމުކަމުގެ މައްޗަށް މަޝްވަރާކުރެވުނެވެ. މިގޮތުން އިންވެސްޓަރުންނަށް ބެންކުތަކުން ލޯނު ހަމަޖެއްސުމާއި އެކަމުގައި ސަރުކާރުން އަދާކުރެވޭނެ ރޯލާއި ގުޅޭގޮތުން މަޝްވަރާކުރިއެވެ. މީގެއިތުރުން ސަރުކާރުން ޓެކްސް ނިޒާމަށް ގެންނަން ހުށަހަޅާފައިވާ ބަދަލުތަކާއި، އެބަދަލުތަކުގެ ސަބަބުން އިންވެސްޓަރުންނަށް ލިބިގެންދާ ފައިދާތަކާބެހޭ ގޮތުންވެސް މަޝްވަރާކުރިއެވެ.
ވިޔަފާރީގެ ދާއިރާއަށް ގެންނަ އިސްލާހުތަކުގެ އިތުރުން، ޖުޑީޝަރީ އިސްލާހުކޮށް، ހަރުދަނާކުރުމުން އިންވެސްޓަރުންނާއި ވިޔަފާރިވެރިންނަށް ލިބިގެންދާނެ ފައިދާތަކުގެ މައްޗަށްޗެސް ސިމްޕޯސިއަމްގައި މަޝްވަރާކުރިއެވެ. މީގެ އިތުރުން މިބައްދަލުވުމުގައި ޓެރަރިޒަމްގެ ނުރައްކަލާ ބެހޭގޮތުންވެސް މަޝްވަރާކުރިއެވެ.
ރާއްޖޭގައި އެކި ދާއިރާތަކުން އިންވެސްޓްކުރާނެ، އިންވެސްޓަރުން ހޯދުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މިގޮތުން މިދިޔަ ޖޫންމަހުގެ ތެރޭގައި ސަރުކާރުން ވަނީ ގިނަ އަދަދެއްގެ ބޭރުގެ އިންވެސްޓަރުންނާއެކު ޕާޓްނަރޝިޕް ފޯރަމެއްވެސް ބާއްވާފައެވެ.