ގުޅިފަޅުގައި ބައިނަލްއަޤްވާމީ ބަނދަރެއް ތަރައްޤީކުރުމަށް ކޮންސަލްޓަންޓެއް އައްޔަނުކޮށްފިއެވެ.
ފިނޭންސް މިނިސްޓްރީން ބުނީ ގުޅިފަޅުގައި ބައިނަލްއަޤްވާމީ ބަނދަރެއް ތަރައްޤީކުރުމަށްޓަކައި ކޮންސަލްޓެންސީ ދިނުމަށް ހަމަޖައްސާފައިވަނީ ބޭރުގެ ދެ ކުންފުންޏެއް ހިމެނޭ ޖޮއިންޓް ވެންޗަރއަކާކަމަށެވެ.
އެ ދެ ކުންފުންޏަކީ ޑެންމާކުގެ ނިރާސް އޭ.އެސް ކުންފުންޏާއި ހޮލެންޑުގެ މެރިޓައިމް އެންޑް ޓްރާންސްޕޯޓް ބިޒްނަސް ސޮލިއުޝަންއެވެ. މިމަސައްކަތުގެ ސަބް ކޮންސަލްޓަންޓުންގެ ގޮތުގެ ހަމަޖައްސާފައިވަނީ ރާއްޖޭގެ ތިން ކުންފުންޏެއްކަމަށްވާ ވޯޓަރ ސޮލިއުޝަންސް، ކްލެރިން މޯލްޑިވްސް އަދި ބީޗްރޮކް ވެންޗަރސްއެވެ.
ފިނޭންސް މިނިސްޓްރީން ބުނީ ކޮންސަލްޓަންސީގެ މަސައްކަތް ހަވާލުކޮށްފައިވަނީ އެއް މިލިއަން ފަންސާސް ހާސް ޑޮލަރަށްކަމަށެވެ.
ގުޅިފަޅުގައި ބައިނަލްއަޤްވާމީ ބަނދަރެއް ތަރައްޤީކުރުމަށް ކޮންސަލްޓަންސީ ދިނުމަށް ހަވާލުކުރި ޑޮންމާކާއި ހޮލެންޑުގެ ދެ ކުންފުންޏަކީ ދުނިޔޭގެ އެކި ކަންކޮޅުތަކުގައި ހިންގާފައިވާ މިފަދަ ބިޔަ މަޝްރޫޢުތަކަށް ކޮންސަލްޓަންސީ ދީފައިވާ ކުންފުނިތަކެކެވެ. އޭގެ ތެރޭގައި އެންމެ ގިނައީ ދުނިޔޭގެ އެކި ސަރަޙައްދުތަކުގައި ތަރައްޤީކޮށްފައިވާ ޓްރާންސްޝިޕްމަންޓް ބަނދަރުތަކެވެ،
ކޮންސަލްޓަންސީގެ މަސައްކަތުގެ ދަށުން މި މަޝްރޫއަށް ބޭނުންވާ ދިރާސާތައް ކުރުމާއި، މަޝްރޫއުގެ ތަފްސީލީ ރިޕޯރޓް އެކުލަވާލުމާއި، ގުޅިފަޅުގެ މާސްޓަރ ޕްލޭން އެކުލަވާލުމާ، މި މަޝްރޫއަށް ބޭނުންވާ އިންޖިނިޔަރިންގ ކުރެހުންތައް އެކުލަވާލުން ފަދަ މަސައްކަތްތައް ހިމެނެއެވެ.
ގުޅިފަޅުގައި ބައިނަލްއަޤުވާމީ ބަނދަރެއް ތަރައްޤީ ކުރުމުގެ މަސައްކަތަކީ ސަރުކާރުން އެންމެ އިސްކަމެއްދީގެން ކުރާ އެއް މަސައްކަތެވެ. ގުޅިފަޅުގެ އިތުރުން ރާއްޖޭގެ އުތުރާއި ދެކުނުގައިވެސް ބައިނަލްއަޤްވާމީ ބަނދަރުތަކެއް ތަރައްޤީކުރުމަށްވެސް ސަރުކާރުން ދަނީ މަސައްކަތްކުރަމުންނެވެ.