ހޮޓެލިއަރ މޯލްޑިވްސްއިން އިންތިޒާމްކޮށްގެން ބާއްވާ 5 ވަނަ ޖެނެރަލް މެނޭޖަރުންގެ ފޯރަމް ނުވަތަ ޖީއެމް ފޯރަމް ކްރޮސް ރޯޑްސް މޯލްޑިވްސްގައި ބޭއްވުމަށް ހަމަޖައްސައިފިއެވެ.
ޖީއެމް ފޯރަމަކީ ފަތުރުވެރިކަމުގެ ދާއިރާއާ ގުޅުންހުރި އެކި ޚިދުމަތްތައް ފޯރުކޮށްދެމުންދާ ކުންފުނިތަކުގެ ޖެނަރަލް މެނޭޖަރުންނަށް އަމާޒުކޮށްގެން ބާއްވާ ފޯރަމެކެވެ.
އެނބޫދޫ ފަޅުގައި ތަރައްޤީކޮށްފައިވާ ކްރޮސް ރޯޑްސް މޯލްޑިވްސްގައި ބާއްވާ ހޮޓެލިއަރ މޯލްޑިވްސްގެ 5 ވަނަ ޖީއެމް ފޯރަމް އޮންނާނީ އަންނަ އަހަރުގެ އޭޕްރީލްމަހުގެ 20 ވަނަ ދުވަހުއެވެ.
މިފޯރަމްގައި ފަތުރުވެރިކަމުގެ ދާއިރާއާ ގުޅުންހުރި ފަރާތްތަކުން އެއްތަނަކަށް ޖަމާވެ، ދިމާވާ ގޮންޖެހުންތަކާ ގުޅޭގޮތުން މަޝްވަރާކުރާނެއެވެ. މީގެ އިތުރުން ރާއްޖޭގެ ފަތުރުވެރިކަމުގެ ސިނާޢަތް ކުރިއެރުވޭނެ ގޮތްތަކާ ބެހޭގޮތުންވެސް މިފޯރަމްގައި މަޝްވަރާކުރާނެއެވެ.
ހޮޓެލިއަރ މޯލްޑިވްސްއިން މަޢުލޫމާތުދޭ ގޮތުގައި ކުރިއަށް އޮތް ފޯރަމްގައި ފަތުރުވެރިކަމުގެ ސިނާޢަތުގައި ހަރަކާތްތެރިވާ ތަޖުރިބާކާރުންނާއެކު ޚިޔާލު ބަދަލުކޮށް، އެކި ކަންކަމާ ގުޅޭގޮތުން މަޝްވަރާކުރާނެއެވެ.
5 ވަނަ ޖީއެމް ފޯރަމްގެ ޝިޢާރަކަށް ހަމަޖައްސާފައިވަނީ، ސަސްޓެއިނަބިލިޓީ އެންޑް ހިއުމަން ކެޕިޓަލްއެވެ. މިފޯރަމަކީ ދައުވަތު އަރުވައިގެން ބާއްވާ ފޯރަމެއް ނަމަވެސް، ޖާގަ އޮތް މިންވަރަކުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް މިފޯރަމްގައި ބައިވެރިވުމުގެ ފުރުޞަތު އޮންނާނެކަމަށް ހޮޓެލިއަރ މޯލްޑިވްސްއިން ބުނެއެވެ.
އަންނަ އަހަރު 5 ވަނަ ޖީއެމް ފޯރަމް ބާއްވާއިރު، އެންމެ ފުރަތަމަ ޖީއެމް ފޯރަމް ބާއްވާފައިވަނީ 2016 ވަނަ ހުޅުލޭ އައިލެންޑް ހޮޓަލުގައެވެ.