ވޯލްޑްކަޕް ކޮލިފައިން ގުރޫޕް (އޭ)ގައި ރާއްޖެއާއި ސީރިޔާ ވާދަކުރި މެޗު 2 - 1 ގެ ނަތީޖާއަކުން ސީރިޔާ ކާމިޔާބުކޮށްފިއެވެ.
ޔުނައިޓެޑް އަރަބް އެމިރޭޓްސް (ޔޫއޭއީ)ގައި ކުޅުނު މެޗު ރާއްޖެއިން ފެށީ ސަސްޕެންޝާނާއެކު ޓީމުގެ ކެޕްޓަން އަކުރަމް ޢަބްދުލްޢަނީއާއި އިބްރާހިމް މަހުދީ ނުލައެވެ. އެންމެފަހުން ކުޅުނު ޗައިނާ މެޗުގެ ފުރަތަމަ އެގާރާއިގަ ކުޅުނު ޢަލީ އަޝްފާގު ވެސް މިމެޗު ފެށީ ބެންޗުންނެވެ. މެޗުގެ ފުރަތަމަ ހާފްގައި ދިފާޢަށް އިސްކަންދީގެން ރާއްޖޭގެ ކުޅުންތެރިން ކުޅެމުންދިޔަ މެޗުގެ ފުރަތަމަ ލަނޑު ސޫރިޔާއިން ޖެހީ އޭރިޔާ ބޭރުން ރާއްޖޭގެ ކުޅުންތެރިން ކުރި ފައުލަކުން ސޫރިޔާއަށް ލިބުނު ހިލޭޖެހެމުންނެވެ. މެޗުގެ 26ވަނަ މިނެޓުގައި މިލަނޑު ސޫރިޔާއަށް ކާމިޔާބުކޮއްދިނީ ޓީމްގެ ކެޕްޓަން ޢަމަރު އަލްސޯމާއެވެ.
ސޯމާގެ ލަނޑަށްފަހު ރާއްޖެއަށް ލިބުނު ހިލޭޖެހުމަކުން ހަމްޒާ ފޮނުވާލި ބޯޅަ ދާދުގެ ބޮލުގައި ޖެހިފައި ބޯޅަދިޔައީ ހުރަސް ދަނޑިމަތިން ބޭރަށެވެ. ފުރަތަމަ ހާފްގައި ދިވެހި ޓީމުން ވަނީ ދިފާއީ ރަނގަޅު ކުޅުމެއް ކުޅެފައެވެ.
ދެވަނަ ހާފް ދިވެހި ޓީމުން ފެށީ ބަދަލު ތަކަކާއެކުއެވެ. ދެވަނަ ހާފް ކުޅެން ޢަލީ އަޝްފާގު ނުކުތުމާއެކު ރާއްޖޭގެ ޓީމުން ކުރިޔަށްޖެހި ކުޅެންފެށިއެވެ.
ނަތީޖާއެއްގެ ގޮތުން ދެވަނަ ހާފްގެ ކުރީ ކޮޅު އަޝްފާޤުވަނީ ނުރައްކާތެރި ހަމަލާއެއް ސޫރިޔާގެ ގޯލަށް އަމާޒުކޮށް ފޮނުވާލާފައެވެ. މިހަމަލާއާއެކު ސޫރިޔާއިންވެސް ވަނީ އަވަސް ހަމަލާތަކެއް އުފައްދާފައެވެ. ދެވަނަ ހާފްގެ 60ވަނަ މިނިޓްގައި ލިބުނު ކޯނަރަކުން ބޮލުން ގޯލެއް ވައްދައިގެން އުމަރް އަލްސޯމާ ސޫރިޔާގެ ލީޑް ފުޅާކުރިއެވެ.
ޢަލީ އަޝްފާގަށް ސޫރިޔާއިން ކުރި ފައުލަކާ ގުޅިގެން ރާއްޖެއަށް ލިބުނު ހިލޭ ޖެހުމަކީ މެޗުގައި ސޫރިޔާ އެންމެ ބޮޑަށް ހާސްވެގެން ދިޔަ ވަގުތެވެ. މިފައުލާއެކު ސޫރިޔާގެ ފަހަތައް ކުޅެމުންދިޔަ އަޙްމަދު އަލްސާލިހަށް ރަތްކާޑު ދެއްކިއެވެ.
އެއްކުޅުންތެރިޔަކު މަދުކޮށް ކުޅެމުންދިޔަ ސޫރިޔާއަށް އިތުރު ހާސްކަން ގުނުވީ މެޗުގެ 70ވަނަ މިނިޓްގައި ޢަލީ އަޝްފާޤު ވައްދާލި ގޯލުންނެވެ.
ރާއްޖޭގެ މިލަނޑަށްފަހުވެސް ގޯލްޖަހާނެ ރަނގަޅު ފުރުސަތުތަކެއް ސޫރިޔާ ޓީމަށް ލިބުނެވެ. އެގޮތުން ކެޕްޓަން ސޯމާއަށް ލިބުނު ގިނަ ފުރުސަތުތަކުގެ ހުރަހަކަށްވީ ކީޕަރު ފައިސަލެވެ. ސޫރިޔާވަނީ މިނަތީޖާއާއެކު ދެމެޗު ކާމިޔާބުކޮށް ހަޕޮއިންޓް ހޯދާފައެވެ.
ތާވަލްގެ އެއްވަނާގައި ޗައިނާ އޮތީ 6 ޕޮއިންޓް ހޯދައިގެންނެވެ. ރާއްޖެ އޮތީ 3 މެޗުން ހޯދި 3ޕޮއިންޓާއެކު ފަސްޓީމް ވާދަކުރާ ގުރޫޕްގެ 4 ވަނާގައެވެ. ޗައިނާއަށް ކުރި ލިބެނީ ފައިދާ ގޯލްގެ ތަފާތުންނެވެ. ޗައިނާ ވަނީ މިއަދު ކުޅުނު މެޗު ގުއާމްއާ ވާދަކޮށް 7 ލަނޑު 0 ލަނޑުން ކާމިޔާބުކޮށްފައެވެ. ރާއްޖެ މޮޅުވީ ރަށުން ބޭރުގައި ގުއާމާ ވާދަކުރި މެޗުން އެކަންޏެވެ. ކޮލިފައިންގައި ރާއްޖެ ދެންނުކުންނީ އަމިއްލަ ދަނޑުގައި އަންނަ މަހު 14ވަނަ ދުވަހު ޕިލިޕީންސާ ދެކޮޅަށެވެ.