ކުލި ކޮންޓްރޯލްކުރުމަށް ބާރު އެޅުމުގެ މަޤްޞަދުގައި މާލޭ ޓެނަންޓްސް ޔޫނިއަން، އެމްޓީޔޫ ނަމުގައި މާލޭގައި ކުއްޔަށް އުޅޭ މީހުންގެ ޖަމުޢިއްޔާއެއް ރަޖިސްޓްރީކޮށްފިއެވެ.
މިނިސްޓުރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން، މާލޭ ޓެނަންޓްސް ޔޫނިއަން، އެމްޓީޔޫ ރަޖިސްޓްރީކޮށްފައިވަނީ މިމަހުގެ 13 ވަނަ ދުވަހުއެވެ.
އެމްޓީޔޫއިން ނެރުނު ބަޔާނެއްގައި ބުނީ، މި ޖަމުޢިއްޔާއަކީ އެތައް ޒަމާންތަކެއް ވަންދެން މާލޭގައި ކުއްޔަށް ދިރިއުޅެމުން އަންނަ މީހުންގެ ވޭނާއި ތުރާތައް ހިއްސާކުރުމަށާއި އަދި ކުއްޔަށް ދިރިއުޅޭ މީހުންގެ އަޑަށް ރަސްމީ ސިފައެއް ދިނުމުގެ ގޮތުން އުފެއްދި ޖަމުޢިއްޔާއެއްކަމަށެވެ. މިޖަމުޢިއްޔާގެ މައިގަނޑު މަގްސަދަކީ މާލޭގައި ކުއްޔަށް ދިރިއުޅޭ މީހުންގެ ހައްގުތައް ހިމާޔަތްކޮށް ދިފާއުކުރުމާއި ކުއްޔަށް ދިރިއުޅޭ މީހުންނަށް އެހީތެރިކަން ފޯރުކޮށްދިނުންކަމަށް އެމްޓީޔޫއިން ބުނެއެވެ. މިގޮތުން އެއްގެއިން އަނެއްގެއަށް ބަދަލުވާއިރު ދިމާވާ މައްސަލަތަކުގައި އެހީތެރިކަމާއި، ކޮންޓްރެކްޓު ހެދުމާއި އަދި އެހެނިހެން މައްސަލަތަކުގައި ވަކީލުންގެ އެހީތެރިކަމާއި އަދި ހޯމް އިންޝުއަރެންސް ފަދަ ޚިދުމަތްތަށް ލިބޭނޭ ގޮތް ފަހިކޮށްދޭނެކަމަށްވެސް އެޖަމުޢިއްޔާއިން ބުނެއެވެ.
އެމްޓީޔޫގެ ބަޔާނުގައި މާލޭގެ އާބާދީގެ 63 އިންސައްތައަކީ ކުށްޔަށް އުޅޭ ފަރާތްތަކަށްވާއިރު މިފަދަ ޖަމުޢިއްޔާއެއްގެ ސަބަބުން މާލޭގައި ކުއްޔަށް ދިރިއުޅޭ މީހުންގެ ބޭނުންތައް ފުރިހަމަ ކޮށް، ކުލީގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރެވިގެންދާނެކަމަށް އެޖަމުޢިއްޔާއިން ބުނެއެވެ.