އަތޮޅުތެރޭގެ ދަނޑުވެރިން ހައްދާ ތަރުކާރީއާއި މޭވާގެ ބާވަތްތައް މޯލްޑިވިއަންގެ ފްލައިޓްތަކުގައި މާލެ ގެނެސްދޭ އަގު ހެޔޮކޮށްފައިވާ ކަމަށް އައިލެންޑް އޭވިއޭޝަނުން ހާމަކޮށްފިއެވެ.އައިލެންޑް އޭވިއޭޝަނުން ބުނީ، އެކުންފުނިން ހިންގާ އެއާޕޯޓުތަކުން މާލެ ގެންނަ ދަނޑުވެރިކަމުގެ ބާވަތްތަކުގެ ކާގޯ އަގު %50އާއި %60 އާއި ހަމަޔަށް ހެޔޮކޮށްފައިވާ ކަމަށެވެ. އަދި ކިލޯއަކަށް ކުރިން 10 ރުފިޔާ އާއި 12 ރުފިޔާ ނެގިކަމުގައި ވިޔަސް މިހާރު ނަގަނީ 4 ރުފިޔާ ކަމަށްވެސް އެކުންފުނިން ބުނެއެވެ.ނޫސްވެރިންނަށް މައުލޫމާތު ދެއްވަމުން އައިލެންޑް އޭވިއޭޝަންގެ މެނޭޖިންގ ޑިރެކްޓަރ އަބްދުލް ހާރިސް ވިދާޅުވީ، ދަނޑުވެރިކަމުގެ ބާވަތްތަކަށް ޚާއްސަ ރޭޓްތަކެއް ކަނޑައެޅީ ދަނޑުވެރިން އުފައްދާ ބާވަތްތަކަށް މާރކެޓް ކުރެވޭނެ ގޮތެއް ހޯދައިދިނުމުގައި ފިޝަރީޒް މިނިސްޓްރީންކުރާ މަސައްކަތުގައި އެކުންފުނިން އެހީތެރިވެދިނުމުގެ ގޮތުން ކަމަށެވެ.އައިލެންޑް އޭވިއޭޝަނުން ދަނީ ރާއްޖޭގެ 8 ސަރަޙައްދެއްގައި އެއާރޕޯޓް ހިންގަމުންނެވެ.