ދެކުނު އޭޝިއާ ސަރަހައްދުގައި ފަތުރުވެރިކަމުގެ ދާއިރާއިން ފާހަގަކުރެވޭ ފަރާތްތަކަށްދޭ ސައުތު އޭޝިއަން ޓްރެވަލް އެވޯޑްސް، ސަޓާގެ ޕާޓްނަރުންނާއެކު ސޮއިކޮށްފިއެވެ.
މާގިރި ހޮޓެލްގައި އިއްޔެ ބޭއްވި ސޮއިކުރުމުގެ ރަސްމިއްޔާތުގައި ސަޓާގެ ޕްލެޓިނަމް ޕާޓްނަރެއްގެ ގޮތުގައި ހަމަޖައްސާފައިވަނީ ލަގްޒަރީ ޔޮޓު އާއި ފައިބަރު ބޯޓުފަހަރު ބަނުމުގައި ދުނިޔޭގެ ނަން މަޝްހޫރު ކުންފުނި "ގަލްފު ކުރާފްޓް އެވެ. ސަޓާގެ ގޯލްޑު ޕާޓްނަރަކަށް ހަމަޖައްސާފައިވަނީ ރާއްޖެއަށް ތެޔޮ އެތެރެކޮށް ޑިސްޓްރިބިއުޓް ކުރާ "ދަ ހޯކްސް" އެވެ.
- ސަޓާ 2020 އަށް ހަމަޖެއްސި އިތުރު ޕާޓްނަރުން ގެ ތެރޭގައި:-
- ޑިޖިޓަލް ޕާޓްނަރު: އުރީދޫ މޯލްޑިވްސް
- އޮފިޝަލް އޮޑިޓަރ ޕާޓްނަރު: ކްރޯވް މޯލްޑިވްސް
- ހޮސްޕިޓަލިޓީ ޕާޓްނަރު: މާގިރި ހޮޓެލް
- މާޗަންޑައިސް ޕާޓްނަރު: ވަން މޯލްޑިވްސް
- ބެވެރޭޖް ޕާޓްނަރު: ކޮކާ ކޯލާ
- ސެކިއުރިޓީ ޕާޓްނަރު: އެބްސުލޫޓް ސެކިއުރިޓީ އެންޑް އެޑްވާންސް ޕްރޮޓެކްޝަން
- ވީޑިއޯގުރަފީ ޕާޓްނަރު: ސްކޭޕް
މިއަހަރުގެ ސަޓާ އެވޯޑްސްގައި ވިޒިޓާސް ޗޮއިސް އަދި ސްޕެޝަލް ރިކޮގްނިޝަން އެވޯޑްސްގެ އިތުރަށް ނުވަ ކެޓަގަރީއެއް އިތުރުކޮށް، ޖުމްލަ 52 ކެޓަގަރީއަކަށް ވާދަކުރުމުގެ ފުރުސަތު މިމަހުގެ 10 ވަނަ ދުވަހު ވަނީ ހުޅުވާލާފައެވެ. ސަޓާގެ ވެބްސައިޓް މެދުވެރިކޮށް، އެކި ކެޓަގަރީތަކަށް ނޮމިނޭޝަންތައް ހުށަހެޅޭނެކަމަށް ހައިރައިސްއިން މައުލޫމާތު ދެއެވެ. އަދި ނޮމިނޭޝަންތައް ހުށަހެޅުމުގެ ފުރުޞަތު އަންނަ މަހުގެ 29 ވަނަ ދުވަހުގެ ނިޔަލަށްވަނީ ހުޅުވާލާފައެވެ.
ހައިރައިޒް އިން އިންތިޒާމު ކޮށްގެން 2016 ވަނަ އަހަރުން ފެށިގެން ކޮންމެ އަހަރު ބާއްވަމުން އަންނަ ސަޓާ އަކީ ސަރަހައްދީ ދެކުނު އޭޝިއާ ސަރަހައްދުގެ ފަތުރުވެރިކަމާއި، ހޮސްޕިޓާލިޓީ ދާއިރާގެ ކުރިއެރުވުމަށް ބާރުއަޅާ އެވޯޑެކެވެ. ސަޓާ އެވޯޑްސް އެންމެ ފުރަތަމަ ބާއްވާފައިވަނީ 2016 ވަނަ އަހަރު ސްރީލަންކާގެ ކޮލަމްބޯގައެވެ. އަދި ޖެހިގެން އައި 2017 އަހަރު ރާއްޖޭގެ އައްޑޫ ސިޓީގެ އީކުއޭޓާ ވިލޭޖުގައި އެވޯޑް ހަފްލާ ބޭއްވިއިރު 2018 ވަނަ އަހަރު ސަޓާ އެވޯޑްސް ހަފުލާ ބޭއްވީ އިންޑިއާގެ މުމްބާއީގައެވެ. އަދި މިދިޔަ އަހަރު އެވޯޑްސް ހަފްލާ ބާއްވާފައިވަނީ ސްރީލަންކާގެ އަމާރީ ގޯލްގައެވެ.