އުރީދޫ މޯލްޑިވްސްގެ ޚިއްސާއަކަށް 3 ރުފިޔާ 30 ލާރި ބެހުމަށް އުރީދޫ މޯލްޑިވްސްގެ ޑިރެކްޓަރުންގެ ބޯޑުން ނިންމައިފިއެވެ.
އުރީދޫ މޯލްޑިވްސްއިން ނެރުނު ބަޔާނެއްގައި ބުނީ އުރީދޫ މޯލްޑިވްސްގެ ޚިއްސާއަކަށް 3 ރުފިޔާ 30 ލާރި ބެހުމަށް އެކުންފުނީގެ އަހަރީ އާއްމު ޖަލްސާއަށް ހުށަހެޅުމަށް ނިންމާފައިވަނީ އިއްޔެ ބޭއްވި އެކުންފުނީގެ ޑިރެކްޓަރުންގެ ބޯޑުގެ ބައްދަލުވުމުގައިކަމަށެވެ. އަދި ބޯޑުން ފާސްކުރި ގޮތަށް ޚިއްސާގެ ފައިސާ ބެހުމަށް އަންނަމަހު ބާއްވާ އެކުންފުނީގެ އަހަރީ އާއްމު ޖަލްސާއަށް ހުށަހަޅާނެކަމަށެވެ. އަދި އަހަރީ އާއްމު ޖަލްސާގެ ނޯޓިސް މިމަހުގެ 16 ވަނަ ދުވަހުގެ ކުރިން އާއްމުކުރާނެކަމަށްވެސް އުރީދޫ މޯލްޑިވްސްއިން ބުނެއެވެ.
އުރީދޫ މޯލްޑިވްސްގެ ޙިއްސާއަކަށް 3 ރުފިޔާ 30 ލާރި ބެހުމަށް އުރީދޫ މޯލްޑިވްސްގެ ބޯޑުން ނިންމާފައިވާއިރު، އެކުންފުންޏަށް މިދިޔަ އަހަރު ލިބުުނު އާމްދަނީ ވަނީ 2 ބިލިއަން ރުފިޔާއަށްވުރެ އިތުރުވެފައެވެ. އަދި ފައިދާގެ ގޮތުގައި އެކުންފުންޏަށް ވަނީ 598 މިލިއަން ރުފިޔާ ލިބިފައެވެ.
އުރީދޫ މޯލްޑިވްސްގެ ހިއްސާއަކަށް 3 ރުފިޔާ 30 ލާރު ބެހުމަށް ނިންމާފައިވާއިރު، 2018 ވަނަ އަހަރު ހިއްސާއަކަށް ބަހާފައިވަނީ 3 ރުފިޔާ 22 ލާރިއެވެ. 2017 ވަނަ އަހަރު 3 ރުފިޔާ 20 ލާރި ބަހާފައިވާއިރު، 2016 ވަނަ އަހަރު ހިއްސާއަކަށް ބަހާފައިވަނީ 2 ރުފިޔާ 75 ލާރިއެވެ.
އުރީދޫ މޯލްޑިވްސްއަކީ 2005 ވަނަ އަހަރު ރާއްޖޭގައި ޓެލެކޮމިއުނިކޭޝަންގެ ޚިދުމަަތްދޭން ފެށި ކުންފުންޏެކެވެ. އެކުންފުނީގެ 9.5 އިންސައްތަ ޙިއްސާ އާއްމުން ދީފައިވާއިރު، ބާކީ 90.5 އިންސައްތަ ހިއްސާއަކީ ޤަތަރުގެ ވަތަނިއްޔާ އިންޓަނޭޝަނަލްގެ ޙިއްސާއެވެ.