ނޮވެލް ކޮރޯނާ ވައިރަސް އަދި ދޫނި ރޯގާއިން ރައްކާތެރިވުމުގެ ގޮތުން މި ބަލިތައް ފެތުރޭ ޤައުމުތަކުން ދިރޭ ޖަނަވާރު އެތެރެކުރުމުގެ ހުއްދަދިނުން ވަގުތީ ގޮތުން މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން މެދުކަނޑާލައިފިއެވެ.
ފިޝަރީޒް މިނިސްޓްރީން ނެރުނު ބަޔާނެއްގައި ވިދާޅުވީ ބައެއް ޤައުމުތަކުން ދިރޭ ޖަނަވާރު އެތެރެކުރުން ވަގުތީގޮތުން މެދުކަނޑާލީ ކޮރޯނާ ވައިރަސް ފެތުރެން ފަށާފައިވަނީ ޖަނަވާރުންގެ ސަބަބުންކަމަށް ޖަނަވާރުތަކުގެ ސިއްހަތާބެހޭ ޖަމުއިއްޔާ، އޯއައިއީއިން އަދި ދުނިޔޭގެ ސިއްހަތާބެހޭ ޖަމުއިއްޔާ، ޑަބްލިއުއެޗްއޯއިން ލަފާދެއްވާފައި ވުމާއެކުކަމަށެވެ.
މިނިސްޓްރީން ބުނީ ވައިރަސް ޗައިނާގައި ބާރު ދުވެއްޔެއްގައި ފެތުރި، ރޯގާޖެހިފައިވާ މީހުންގެ އަދަދު ޗައިނާގައި އިތުރުވަމުންގޮސް، ޗައިނާގެ އިތުރުން އޭޝިޔާއާއި، ވިލާތާއި، އެމެރިކާ ބައްރުގެ އެތައް ޤައުމަކަށާއި، އޮސްޓްރޭލިއާއަށް މިހާރު މިވައިރަސް ފެތުރި، ރޯގާޖެހިފައިވާ މީހުން ފެންނަ އަދަދު އިތުރުވާކަން ފާހަގަކުރެވިފައިވާކަމަށެވެ. އެހެންކަމުން މިފަދަ ބަލިތަކުން ރައްކާތެރިވުމުގެ ގޮތުން ދިރޭ ނުވަތަ މަރުވެފައިވާ ޖަނަވާރާއި، ރަނގަޅަށް ރޯނުފިލާ ހުންނަ މަސްފަދަ ޖަނަވާރުގެ އުފެއްދުންތައް ބޭނުން ނުކުރުމަށާއި، ޖަނަވާރު ވިއްކާ ތަންތަނަށް ނުދިއުމަށް މިނިސްޓްރީގެ ބަޔާނުގައި އިލްތިމާސްކޮށްފައިވެއެވެ.