ކޮރޯނާވައިރަސްގެ ސަބަބުން އޮސްޓްރޭލިއާގެ އެންމެ ބޮޑު އެއަރލައިންކަމަށްވާ ކަންޓަސް އެއަރވޭސްއަށް 99 މިލިއަން ޑޮލަރުގެ ގެއްލުމެއް ކުރިމަތިވެދާނެކަމަށް އެ އެއަރލައިނުން ބުނެފިއެވެ.
ކަންޓަސް އެއަރވޭސްއިން ބުނެފައިވަނީ ކޮރޯނާވައިރަސްގެ ސަބަބުން ގެއްލުމާ ކުރިމަތިލާން ޖެހިފައިވަނީ އޭޝިޔާގެ ޤައުމުތަކަށް ފަތުރުވެރިންނާ އެހެން ކަންކަމުގައި ދަތުރުކުރާ ފަރާތްތައް މަދުވަމުންދާތީކަމަށެވެ.
ކަންޓަސް އެއަރވޭސްއިން މަޢުލޫމާތުދޭ ގޮތުގައި ކޮރޯނާވައިރަސްގެ ސަބަބުން މޭމަހުގެ ނިޔަލަށް އޭޝިޔާގެ އެކި ހިސާބުތަކަށް ޝެޑިއުލްކޮށްފައިވާ ފްލައިޓްތައް މަދުކުރަން އެ އެއަރލައިނުން ވަނީ މިހާރު ނިންމާފައެވެ. އަދި މިކަމުގެ ސަބަބުން ދަތުރުތައް މަދުވެ، އެ އެއަރލައިންނަށް 150 މިލިއަން އޮސްޓްރޭލިއަން ޑޮލަރު ނުވަތަ 99 މިލިއަން ޑޮލަރުގެ ގެއްލުމަކާ ކުރިމަތިލާންޖެހޭނެކަމަށް ކަންޓަސްއިން ލަފާކުރެއެވެ.
ކަންޓަސް އެއަރވޭސްއިން ނެރުނު ބަޔާނެއްގައި ބުނީ ކޮރޯނާވައިރަސްގެ ސަބަބުން ޗައިނާއަށް ކުރާ ހުރިހާ ދަތުރުތަކެއް ހުއްޓާލާފައިވާއިރު، ހޮންކޮންގްއާއި ސިންގަޕޫރަށް ކުރާ ދަތުރުތަކަށް އޮންނަ ޑިމާންޑުވެސް މިހާރު ވަރަށް ބޮޑަށް ކުޑަވެފައިވާކަމަށެވެ.
ކޮރޯނާވައިރަސްގެ ސަބަބުން އޭވިއޭޝަން ސިނާޢަތުގައި ހަރަކާތްތެރިވާ ކުންފުނިތަކަށް ގެއްލުމާ ކުރިމަތިލާންޖެހިފައިވާއިރު، އެންމެ ބޮޑަށް އަސަރުކޮށްފައިވަނީ ޗައިނާގެ އެއަރލައިންތަކަށެވެ. އެގޮތުން ޗައިނާގެ ގިނަ އެއަރލައިންތަކެއް އޮޕަރޭޓްކުރާ އެޗް.އެން.އޭ ކުންފުންޏަށް ގެއްލުމާ ކުރިމަތިލާންޖެހިފައިވާއިރު، ހައިނާން ޕްރޮވިންސްގެ ސަރަޙައްދީ ސަރުކާރުން ދަނީ އެކުންފުނި ގަތުމުގެ މަޝްވަރާކުރަމުންނެވެ. މިއީ ކޮރޯނާވައިރަސްގެ ސަބަބުން ކުރިމަތިވެދާނެ ގެއްލުންތައް ކުޑަކުރުމަށް ޗައިނާއިން މިހާތަނަށް އެޅި މުހިއްމު ފިޔަވަޅެއްކަމަށް ބައެއް ފަރާތްތަކުން ބުނެއެވެ.
އިންޓަނޭޝަނަލް މަނިޓަރީ ފަންޑު، އައިއެމްއެފްއިން ބުނާގޮތުން ކޮރޯނާވައިރަސް ފެތުރުން ނުހުއްޓުވިއްޖެނަމަ އެކަމުގެ ސަބަބުން ދުނިޔޭގެ އިޤްތިޞާދަށް ބޮޑު ގެއްލުމަކާ ކުރިމަތިލާންޖެހިދާނެއެވެ.