މޯލްޑިވްސް އޮންޓަޕްރިނިއާސް ސަމިޓް އަންނަ ހޯމަދުވަހު ފެށުމަށް ތައްޔާރުވެއްޖެއެވެ.
ކޯޕަރޭޓް މޯލްޑިވްސްއިން އިންތިޒާމްކޮށްގެން ބާއްވާ މޯލްޑިވްސް އޮންޓަޕްރިނިއާސް ސަމިޓު ފަށާނީ ހޯމަ ދުވަހު މެންދުރުފަހު ދަރުބާރުގޭގައެވެ.
ކޯޕަރޭޓް މޯލްޑިވްސްއިން މަޢުލޫމާތުދޭ ގޮތުގައި މި ސަމިޓުގައި ވިޔަފާރީގެ ދާއިރާގައި ތަޖުރިބާ ލިބިފައިވާ ގިނަ އަދަދެއްގެ ތަޖުރިބާކާރުން ބައިވެރިވާނެއެވެ. އަދި ސަމިޓުގައި ބައިވެރިވާ ފަރާތްތަކުގެ ސުވާލުތަކަށް ތަޖުރިބާކާރުންގެ ޕެނަލްއަކުން ޖަވާބުދިނުމަށް ހަމަޖެހިފައިވާކަމަށްވެސް ކޯޕަރޭޓް މޯލްޑިވްސްއިން ބުނެއެވެ.
ކޯޕަރޭޓް މޯލްޑިވްސްއިން މަޢުލޫމާތުދޭ ގޮތުގައި މިސަމިޓުގެ ތެރެއިން މާލީ ދާއިރާއާއި، އިޤްތިޞާދާއި ވިޔަފާރިއާ ގުޅޭގޮތުން ތަޖުރިބާ ހިއްސާކުރުމުގެ ފުރުޞަތު ލިބިގެންދާނެއެވެ. އަދި މިސަމިޓުގެ ތެރެއިން ވިޔަފާރިވެރިންނަށް ދިމާވާ ގޮންޖެހުންތަކާއި އާ ވިސްނުންތަކާމެދު މަޝްވަރާކުރާނެކަމަށްވެސް ކޯޕަރޭޓް މޯލްޑިވްސްއިން ބުނެއެވެ.
ވިޔަފާރިވެރިންނަށް އަމާޒުކޮށް މޯލްޑިވްސް އޮންޓަޕްރިނިއާސް ސަމިޓް ބާއްވަން ނިންމާފައިވާއިރު، ކޯޕަރޭޓް މޯލްޑިވްސްއިން ވަނީ މިދިޔަ އަހަރު ޒުވާން ވިޔަފާރިވެރިންނަށް އަމާޒުކޮށް، މޯލްޑިވްސް ޔަންގް އޮންޓަޕްރިނިއާސް ސަމިޓް ބާއްވާފައެވެ.