ކޮރޯނާ ވައިރަސްގެ ސަބަބުން ދުނިޔޭގެ ގިނަ ކުންފުނިތަކުން ދަނީ މިއަހަރުގެ ފުރަތަމަ ތިން މަހުގެ ތެރޭގައި އެކުންފުނިތަކަށް ލިބޭނެ ކަމަށް ކުރިން އަންދާޒާކުރި ވަރުގެ ފައިދާއެއް ނުލިބޭނެ ކަމަށް ބުނަމުންނެވެ. ނަމަވެސް ބޮޑެތި ކުންފުނިތަކަށް އިންވެސްޓްކުރާ ފަރާތްތަކުން ދަނީ ކޮރޯނާގެ ސަބަބުން ލިބެމުންދާ ގެލުންތަކުން ފަސޭހަކަމާއެކު އަރައިގަނެވޭނެކަމަށްވެސް ބުނަމުންނެވެ.
ކޮރޯނާގެ ސަބަބުން ކުންފުނިތަކުގެ ފުރަތަމަ ކުއަޓާގެ ފައިދާ ކުރިން ލަފާކޮށްފައިވާ ވަރަށް ވުރެ ދަށަށް ދާނެކަމަށް މިހާރު ބުނަމުންދާއިރު، ބައެއް ކުންފުނިތަކުން ލިބޭނެ ގެއްލުމާއި، ފުރަތަމަ ކުއަޓާގައި ލިބޭނެ ފައިދާ އަންދާޒާކޮށް އަދަދުތައްވެސް ދަނީ ހާމަކުރަމުންނެވެ. ނަމަވެސް ކޮރޯނާގެ ސަބަބުން ކުންފުނިތަކާއި، އިޤްތިސާދުތަކަށް ކުރާނެ އަސަރު އެންމެ ސާފުކޮށް އަދި ނޭނގޭކަމަށް ދުނިޔޭގެ އިޤްތިސާދު ދިރާސާ ކުރައްވާ ފަރާތްތަކުން ދަނީ ބުނަމުންނެވެ.
ކުރިއަށް އޮތް މަސްތަކުގެ ތެރޭގައި ކޮރޯނާ ވައިރަސް ކޮންޓްރޯލްވެގެން ދާނެކަމަށް ސިއްހީ މާހިރުން ބުނަމުންދާއިރު، ޗައިނާ ނޫން އެހެން ޤައުމެއްގައި މި ވައިރަސް ހަލުވިކޮށް ނުފެތުރޭނެ ކަމަށެވެ. ނަމަވެސް ވައިރަސް ކޮންޓްރޯލް ކުރެވުނުކަމުގައިވިޔަސް، ޗައިނާގެ އިޤްތިސާދު އަވަސް ދުވެއްޔެއްގައި ހަމައަށް ނޭޅިއްޖެނަމަ އިންވެސްޓަރުންނަށް ބޮޑެތި ގެއްލުންތަކެއް ވާނެކަމަށް ލަފާކުރެވެއެވެ.
ގިނަ އިންވެސްޓަރުން ޤަބޫލުކުރާ ގޮތުގައި ކޮރޯނާގެ ސަބަބުން ޗައިނާ އަދި ދުނިޔޭގެ އިޤްތިސާދުތަކަށްވެސް ކުރަމުންދާ އަސަރުތަކަކީ ވަގުތީ ކަމެކެވެ. އަދި މިއަހަރުގެ ފުރަތަމަ ކުއަޓާގައި ކޮރޯނާގެ ސަބަބުން ވިޔަފާރިތަކަށް އަސަރު ކުރިނަމަވެސް ކުރިޔަށް އޮތް ކުއަޓަރުތަކުގައި މިކަން ހައްލުކުރުމަށް ވަރުގަދަ ފިޔަވަޅުތަކެއް އެޅިއްޖެނަމަ، ލިބޭ ގެއްލުމުން އަރައިގަނެ، އަލުން އާދައިގެ މަތިން ކަންކަން ކުރިޔަށް ގެންދަން މަގުފަހި ވާނެކަމަށް ތަޖުރިބާކާރުން ބުނެއެވެ.
ކޮރޯނާގެވައިރަސްގެ ސަބަބުން ދުނިޔޭގެ ބޮޑެތި އެއަރލައިންތަކަށް 30 ބިލިއަން ޑޮލަރުގެ ގެއްލުން ވާނެކަމަށް ވަނީ އިންޓަރނޭޝަނަލް އެއަރ ޓްރާންސްޕޯޓް އޭވިއޭޝަން، އައިއޭޓީއޭ ލަފާކޮށްފައެވެ. އަދި ވައިގެ ދަތުރުފަތުރަށް އޮތް ޑިމާންޑު 4.7 އިންސައްތަ ވެއްޓޭނެކަމަށްވެސް ލަފާކުރެއެވެ.
ކޮރޯނާގެ ސަބަބުން ޗައިނާގެ ބަނދަރުތަކުގެ މަސައްކަތް މަޑުޖެހި، ކޮންޓެއިނަރ ޝިޕިން ދާއިރާއަށްވެސް ނޭދެވޭ އަސަރު ވަނީ ކޮށްފައެވެ. މިގޮތުން ދުނިޔޭގެ އެންމެ ބޮޑު ކޮންޓެއިނަރ ޝިޕިން ވިޔަފާރިކުރާ މައެސްކްއިން ބުނީ ޗައިނާގެ ފެކްޓްރީތައް މިހާރުވެސް އޮޕަރޭޓްކުރަނީ އެންމެ 60 އިންސައްތައިގެ ކެޕޭސިޓީއެއްގައިވާތީ، އެކުންފުނީގެ ކޮންޓެއިނަރ ވިޔަފާރި އަހަރުގެ ފުރަތަމަ ކޮޅު މަޑުޖެހިފައިވާކަމަށެވެ.
ޗައިނާގައި ކޮރޯނާ ފެތުރުން ހުއްޓުވުމަށް އާންމު ވިޔަފާރިތައް ބަންދުކޮށް، އާންމުން އެއްވެ އުޅެ ތަންތަންވެސް ވަނީ ބަންދުކޮށްފައެވެ. އެހެން ކަމުން ޗައިނާގައި ހިންގާ ޑިޒްނީގެ ޕާކްތަކުން ލިބޭ ފައިދާ މިއަހަރުގެ ފުރަތަމަ ކުއަޓާގައި 280 މިލިއަން ޑޮލަރަށް ވެއްޓޭނެކަމަށް ޑިޒްނީން ވަނީ އަންދާޒާކޮށްފައެވެ. އިޤްތިސާދީ މާހިރުން ލަފާކުރާ ގޮތުގައި ޗައިނާގެ އިޤްތިސާދު މިދަތިތަކުން އަރައިގަތުމުގައި އެންމެ ބޮޑަށް ބަރޯސާ ވާނީ ދުނިޔޭގެ ބޮޑެތި ކުންފުނިތަކަށްކަމަށެވެ.