ތިމާވެށީގެ ކަންކަމުގައި ފަންޑް ހޯދުމަށް ހުރި ހުރަސްތައް ނައްތާލަންޖެހޭ: އެންވަޔަރަންމަންޓް މިނިސްޓަރ
މޫސުމީ ބަދަލުތަކުގެ ސަބަބުން ތިމާވެށްޓަށް ލިބޭ ގެއްލުންތަކުން އަރައިގަތުމުގައި ކުދި ޤައުމުތަކަށް ފަންޑު ހޯދުމަށް ހުރި ހުރަސްތައް ނައްތާލުން މުހިއްމުކަމަށް އެންވަޔަރަންމަންޓް މިނިސްޓަރ ޑރ. ހުސެއިން ރަޝީދު ހަސަން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ތިމާވެށީގެ ކަންކަމަށް ފައިސާ ޚަރަދުކުރުމުގައި އިންޑިއާ ކަނޑުގެ ޖަޒީރާ ޤައުމުތަކަށް ހުރި ގޮންޖެހުންތަކާއި ގުޅޭގޮތުން މަޝްވަރާކުރުމަށް ދެ ދުވަހުގެ މުއްދަތަކަށް ކުރިއަށްދާ "ކްލައިމެޓް ފައިނޭންސް މޮބިލައިޒޭޝަން އެންޑް އެކްސެސް ސްޓްރެޓެޖީ ވަރކްޝޮޕް ފޯރ ދަ އައިލެންޑެ ސްޓޭޓްސް އިން ދަ އިންޑިއަން އޯޝަން" މަސައްކަތު ބައްދަލުވުން ފަށްޓަވާދެއްވާ ވާހަކަފުޅުދައްކަވަމުންނެވެ.
އިންޑިއާ ކަނޑުގެ ޖަޒީރާ ޤައުމުތަކުން މޫސުމަށް އަންނަ ބަދަލުތަކާއި ގުޅިގެން އަޅަންޖެހޭ ފިޔަވަޅުތައް އެޅުމަށް މާލީ ގޮތުންނާއި، ޓެކްނޮލޮޖީގެ ދާއިރާއިންނާއި، އިންސާނީ އަދި އެހެނިހެން ވަސީލަތްތައް ބޭނުންވާނެ މިންވަރު ދެނެގަތުމަށްޓަކައި ދިރާސާއެއް ކުރުމަށް މިނިސްޓްރީ އޮފް އެންވަޔަރަންމަންޓާއި އދ. ގެ މޫސުމަށް އަންނަ ބަދަލުތަކާއި ބެހޭ މުއާހަދާ "ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް" ސެކެޓޭރިއެޓް އާއި ގުޅިގެން މަޝްރޫޢެއް ހިންގުމަށް ވަނީ ހަމަޖެހިފައެވެ. މިއީ މި މަޝްރޫޢުގެ ދަށުން ހިންގާ މަސައްކަތު ބައްދަލުވުމެކެވެ.
މި މަސައްކަތު ބައްދަލުވުމަކީ ދިވެހިރާއްޖެއިން ބައިވެރިވެފައިވާ މޫސުމަށް އަންނަ ބަދަލުތަކާއި ބެހޭ މުއާހަދާ، ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް" އާއި ދިވެހިރާއްޖެ އާއި ގުޅިގެން ބާއްވާ ބައްދަލުވުމެކެވެ.
މި މަސައްކަތު ބައްދަލުވުން ފަށްޓަވާދެއްވާ ވާހަކަފުޅުދައްކަވަމުން އެންވަޔަރަންމަންޓް މިނިސްޓަރ ޑރ. ހުސެއިން ރަޝީދު ހަސަން މޫސުމީ ބަދަލުތަކަކަކީ މިއަދު މުޅި ދުނިޔެ އެކަމުގެ ނުރައްކަލަށް ހުށަހެޅިފައިވާ ބައިނަލްއަޤްވާމީ ބޮޑު މައްސަލައެއް ކަމަށެވެ. އަދި މިކަމުގެ ނުރައްކާ އެންމެ ބޮޑީ ބިން ތިރި ޖަޒީރާ ޤައުމުތަކަށްކަން ފާހަގަކުރައްވައި މިނިސްޓަރ ވިދާޅުވީ، ތިމާވެށީގެ މައްސަލަތަކުން އަރައިގަތުމުގައި ދިމާވާ އެންމެ ބޮޑު ގޮންޖެހުމަކީ ފަންޑު ހޯދުންކަމަށެވެ. އަދި މިއީ ވިޔަފާރީގެ އުޞޫލުން ކުރާކަމެއްގެ ގޮތުގައި ދެކޭ ދެކުން ބަދަލުކުރަންޖެހޭކަމަށް މިނިސްޓަރ ވިދާޅުވިއެވެ.
"ތިމާވެށީގެ ކަންކަމުގައި ދުނިޔޭގެ ކުރިއަރާފައިވާ ޤައުމުތަކުން ބިޒްނަސް އޭޒް ޔޫޝުއަލް ކަމެއްގެ ގޮތުގައި ދެކޭ ދެކުން ބަދަލުކުރަންޖެހޭ. މޫސުމީ ބަދަލުތަކުގެ ސަބަބުން ތިމާވެށްޓަށް ކުރާ ނޭދެވޭ އަސަރުތަކުގެ ނުރައްކާ އެންމެ ބޮޑީ އަޅުގަނޑުމެންފަދަ ޖަޒީރާ ޤައުމުތަކަށްކަމަށްވާއިރު، އެފަދަ ކަންކަމުން އަރައިގަތުމަށް ކުރާ މަސައްކަތްތަކުގައި މިހާރަށްވުރެ ފަސޭހައިން ފަންޑް ލިބޭނެ ގޮތްތައް ހަދަންޖެހޭ" މިނިސްޓަރ ޑރ ހުސައިން ރަޝީދު ހަސަން ވިދާޅުވިއެވެ.
ހޮޓެލް ޖެންގައި ކުރިއަށްދާ މި މަސައްކަތު ބައްދަލުވުމުގެ މައިގަނޑު މަޤްސަދަކީ މިހާރު ތައްޔާރުކުރެވިފައިވާ 'އިންޑިއަން އޯޝަންސް ކްލައިމެޓް ފައިނޭންސް މޮބިލައިޒޭޝަން އެންޑް އެކްސެސް ސްޓްރެޓެޖީ' ގެ ދެލިކޮޕީ ފާސްކޮށް، މިސްޓްރެޓްޖީ ތަންފީޒުކުރާނެ ޕްލޭނެއް އެލުލަވާލުންކަމަށް އެންވަޔަރަންމަންޓް މިނިސްޓްރީން ވިދާޅުވެއެވެ. މި ބައްދަލުވުމުގައި އިންޑިއާ ކަނޑުގެ ޖަޒީރާ ޤައުމަތަކުގެ ތެރެއިން 5 ޤައުމަކުން ވަނީ ބައިވެރިވެފައެވެ. އޭގެ ތެރޭގައި ދިވެހިރާއްޖެ، މޮރިޝަސް، ސީޝެލްސް، ސްރީލަންކާ އަދި ކޮމޯރޮސް ހިމެނެއެވެ.
މި މަސައްކަތު ބައްދަލުވުމަކީ މިނިސްޓްރީ އޮފް އެންވަޔަރަންމަންޓާއި ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ) ގުޅިގެން ބޭއްވޭ މަސައްކަތު ބައްދަލުވުކެވެ.