އައްޑޫ ކަންނެލި ދޯނި ހިފަހައްޓާ ސިފައިންގެ ބެލުމުގެ ދަށަށް ގެނައީ ގަވައިދާ ހިލާފަށް ފަތުރުވެރިންގެ ބައެއް ގޮވައިގެން ޑިއޭގޯ ގާސިއާއި ދިމާއަށް ދަތުރުކުރަމުންދަނިކޮށް ކަމަށް މޯލްޑިވްސް ނޭޝަނަލް ޑިފެންސް ފޯރސްއިން ބުނެފިއެވެ.ނޫސްވެރިންނަށް މައުލޫމާތު ދެއްވަމުން އެމްއެންޑީއެފްގެ އިންފޯރމޭޝަން އޮފިސަރ މޭޖަރ އަދްނާން އިބްރާހިމް ވިދާޅުވީ ރޭ ކުރިއަށް ގެންދިޔަ ހާއްސަ އޮޕަރޭޝަނުގައި ހިފެހެއްޓި ދޯނީގައި ސޯޅަ ދިވެހިންނާއި، ހަތް ފަތުވެރިން ތިބިކަމަށެވެ.އައްޑޫ ކަންނެލި ދޯންޏެއް ފަތުރުވެރިންތަކެއް ގޮވައިގެން ޑިއޭގޯގާސިއާއަށް ދަތުރުކުރަމުންދާ މައުލޫމާތުލިބިގެން އެ ދޯނި ހޯދުމުގެ މަސައްކަތް ވަޔާއި ކަނޑުމަގުން ކުރަމުންދަނިކޮށް އެދޯނި ފެނިފައިވަނީ ރާއްޖޭގެ ސަރަހައްދުން ބޭރުވެފައިވަނިކޮށް ކަމަށްވެސް އަދްނާން މުހައްމަދު ވިދާޅުވިއެވެ. އަދި މި ދޯނިން ދަތުރުކުރި ފަތުރުވެރިން ދެކުނުގެ ދެ އަތޮޅެއްގައި އެމީހުން ގޮވައިގެން ޑިއޭގޯގާސިއާއަށް ގެންގޮސްދޭނެ ބައެއްވޭތޯ ބެލިކަމަށާއި، އަދި އެ ދަތުރުމަތީގައި ކުރެވޭނީ ކޮންކޮން ކަންތައްތަކެއްތޯ އޭގައި ދަތުރުކުރި ފަތުރުވެރިން ބަލާފައިވާކަން އެނގިފައިވާކަމަށްވެސް އެމްއެންޑީއެފްއިން ބުނެއެވެ.މި ދޯންޏާއި ބެހޭ މައުލޫމާތު ދެއްވަމުން ޑިފެންސް މިނިސްޓްރީގެ ސްޓޭޓް މިނިސްޓާރ މުހައްމަދު ޒުހައިރް ވިދާޅުވީ މި ދޯނި ދަތުރުކުރަމުންދިޔައީ ގަވައިދާ ހިލާފަށްކަމަށާއި، މިކަމުގައި ކަންބޮޑުވާންޖެހޭ ކަންކަން ހުރިކަމަށެވެ.އައްޑޫ ސިޓީ މަރަދޫން ފުރައިގެން ދަތުރުކުރި ފަހި ރޯޅި ނަމަކަށް ކިޔާ ދޯނި ހިފެއްހެއްޓުމަށް ހިންގި ހާއްސަ އޮޕަރޭޝަނާއި ބެހޭ މައުލޫމާތު ދެއްވަމުން ކޯސްޓްގާރޑްގެ ކޮމާންޑަރ ކާނަލް މުހައްމަދު އިބްރާހިމް ވިދާޅުވީ އެ ދޯނި ހިފެއްހެއްޓީ އައްޑޫއިން ފަންސާސް ހަތަރު މޭލު ބޭރުގައި ވަނިކޮށްކަމަށެވެ. އަދި މި ފަދަ ކަންކަމުން ރާއްޖޭއާއި ދޭދޭ ގައުމުތަކާއި ދެމެދު އޮންނަ ގުޅުންތަކަށް ބުރޫ އެރުމަކީ އެކަށީގެންވާ ކަމެއްކަމަށްވެސް މުހައްމަދު އިބްރާހިމް ވިދާޅުވިއެވެ.އައްޑޫން ފުރައިގެން ދިޔަ ދޯނި ހިފެހެއްޓި ނަމަވެސް މިހާދިސާއާއި ބެހޭ އިތުރު އެއްވެސް ތަފްސީލެއް އެމްއެންޑީއެފްއަކުންވެސް އަދި ފުލުހުންވެސް މިހާތަނަށް ހާމައެއް ނުކުރެއެވެ. މި މައްސަލަ ތަހްގީގްކުރުމަށް ފުލުހުންނާއި ހަވާލްކޮށްފައިވާކަމަށް އެމްއެންޑީއެފުން ބުނެއެވެ.