އިތުރު 7 މީހުން ބަލިން ރަނގަޅުވެ ކޯވިޑް-19 ޖެހި ޝިފާ ލިބުނު މީހުންގެ ޢަދަދު 1677އަށް އިތުރުވެއްޖެއެވެ.
އެޗްޕީއޭއިން މިރޭ ޢާންމު ކުރި، ރާއްޖޭގެ ކޯވިޑް-19ގެ އެންމެ ފަހުގެ ތަފާސްހިސާބުތައް ދައްކާގޮތުން ރާއްޖޭގައި ބަލިން ރަނގަޅުވި މީހުންގެ ޢަދަދު މިހަފްތާގެ އެހެން ދުވަސްތަކާ އަޅާބަލާއިރު މަދެވެ. ނަމަވެސް ވޭތުވެދިޔަ ދެދުވަހުވެސް ރާއްޖޭގައި ބަލިން ރަބނގަޅުވި މީހުންގެ އަދަދު 350 އަށްވުރެ މައްޗެވެ.
ކޯވިޑް-19އިން ރަނގަޅުވާ މީހުން ދޫކޮށްލުމުގައި ރާއްޖޭގައި ބަލާ މިންގަނޑަށް ޑަބްލިއުއެޗްއޯގެ އެންގުންތަކާ އެއްގޮތަށް މިހާރު ޢަމަލުކުރަމުންދާއިރު، އޭގެތެެރޭގައި ބަލި ނެތްކަން ކަށަވަރުކުރުމަށް ހޭދަކުރަންޖެހޭ މުއްދަތައްވަނީ ބަދަލުގެނެސްފައެވެ.
ދިފާޢީ ނިޒާމް ރަނގަޅު މީހުން ކޯވިޑް-19އިން ރަނގަޅުވުމުން ދޫކޮށްލާއިރު ބަލިހުރިތޯ ބެލުމަށް ހަދާ ޕީސީއާރު ޓެސްޓު ނުހަދަން އެޗްޕީއޭއިން މިހާރު ނިންމަވާފައިވީނަމަވެސް ޓެސްޓުތަކުގެ ނަތީޖާތައް ނެގެޓިވްވެ، ރޯގާއެއް ނުވަތަ އެނޫންވެސް ހުމުގެ ޢަލާމާތެއްވާނަމަ އެމީހަކު ދޫކޮށްލާނީ އިތުރު މުއްދަތަކަށް ބެލުމަށްފަހުކަމަށް އެޗްޕީއޭއިން ވަނީ ހާމަކުރައްވާފައެވެ.