ރާއްޖެއިން ކޯވިޑް19އާ ދެކޮޅަށް ކުރާ މަސައްކަތަށް 50 މިލިއަން ޑޮލަރުގެ އެހީއެއް ދިނުމަށް އޭޝިއަން ޑިވެލޮޕްމަންޓް ބެންކު، އޭޑީބީން ނިންމައިފިއެވެ.
އޭޑީބީން މަޢުލޫމާތުދޭ ގޮތުގައި 50 މިލިއަން ޑޮލަރުގެ ލޯނުގެ ތެރޭގައި ހިމެނެނީ 25 މިލިއަން ޑޮލަރުގެ ކޮންސެޝަން ލޯނަކާއި 25 މިލިއަން ޑޮލަރުގެ ހިލޭ އެހީއެކެވެ.
އޭޑީބީން ރާއްޖެއަށް ދޭ އެހީއަކީ މިދިޔަ އޭޕްރީލްމަހު އޭޑީބީން ޤާއިމްކުރި 20 ބިލިއަން ޑޮލަރުގެ ފަންޑެއްގެ ދަށުން ދޭ އެހީއެކެވެ. އޭޑީބީން ދިން އެހީގެ ދަށުން ރާއްޖޭގެ 5 ސަރަޙައްދެއްގައި ކޯވިޑްއަށް ޓެސްޓްކުރެވޭނެ އިންތިޒާމް ހަމަޖައްސާނެއެވެ. މީގެއިތުުރުން ޓެސްޓްކުރެވޭނެ އަދަދު އިތުރުކުރުމާއި، ބަލި މީހުންނަށް ފަރުވާ ދިނުމަށް ޚާއްސަ ވޯޑްތައްވެސް ޤާއިމްކުރާނެއެވެ. ޞިއްހީ ދާއިރާގެ އިތުރުން، ވަޒީފާއަށް އަސަރުކުރި ފަރާތްތަކާއި ގެއްލުން ލިބުނު ވިޔަފާރިތަކަށް އެހީތެރިވުމަށް ސަރުކާރުންކޮށްދޭ މަސައްކަތަށްވެސް އެހީތެރިކަން ފޯރުކޮށްދޭނެކަަމަށް އޭޑީބީން މަޢުލޫމާތުދެއެެވެ.