2018ވަނަ އަހަރު އެފްއޭއެމްގެ މޯލްޑިވިސް ފުޓްބޯޅް އެވޯޑުގައި އެންމެ އުންމީދީ ކުޅުންތެރިޔާގެ އެވޯޑް ހާސިލް ކުރި މުހަންމަދު ޖައިލަމް (އޮގީ) އަންނަ ސީޒަންގައި ކުލަބް ގްރީން ސްޓްރީޓަށް ކުޅެން ސޮއިކޮށްފިއެވެ.
މިދިޔަ ސީޒަންގައި ކަކުލަށް ލިބުނު އަނިޔާކާގުޅިގެން އޮގީ ވަނީ ސީޒަންގެ ވަކި ހިސާބަކުން ކުޅުމާ ދުރަށްދާން ޖެހިފައެވެ. އޭގެ ކުރިން އޭނާ ވަނީ 23 އަހަރުން ދަށުގެ ގައުމީ ޓީމަށާއި ސީނިއަރ ގައުމީ ފުޓްބޯޅަ ޓީމުން ޖާގަހޯދާފައެވެ.
އެންމެ ފަހުން ބޭއްވި އައިއޯއައިޖީގައި ރާއްޖެއިން ބައިވެރި ޓީމްގެ އިތުރުން ވޯލްޑްކަޕް ކޮލިފައިން އަދި އޭޝިއަން ކަޕް ޖޮއިން ކޮލިފައިންގައި ވާދަކުރި ގައުމީޓީމުން ވެސް އޮގީ ވަނީ ޖާގަހޯދާފައެވެ.
އޭނާ ވަނީ މީގެ ކުރިން ބީޖީ ސްޕޯސްޓް ކުލަބާއެކު ފުރަތަމަ ޑިވިޝަންގައި ވާދަކޮށްފައެވެ.
ހުސްވި ސީޒަންގައި އޮގީ ފެނިގެންދިޔައީ ފޯކައިދޫގެ ވައިސް ކެޕްޓަނެއްގެ ގޮތުގައެވެ.