ކުޑަކުދިންނާއި ގުޅޭ މައްސަލަތައް 24 ގަޑިއިރުތެރޭގައި ތަހުގީގުކޮށް ފިޔަވަޅު އެޅުމަށް ކަނޑައަޅައިފި

ކުޑަކުއްޖަކާއި މެދު ޤާނޫނުގައި ކަނޑައަޅާފައިވާ ކުށެއް ކޮށްފައިވާކަމަށް ބެލެވޭ ފަދަ މައްސަލައެއްގެ މަޢުލޫމާތު ލިބޭތާ ގިނަވެގެން 24 ގަޑިއިރުގެ ތެރޭގައި އެ މައްސަލައެއް ތަޙުގީގުކޮށް ފިޔަވަޅު އެޅުމަށް ފުލުހުންނަށް ހުށައަޅަންޖެހޭނެކަމަށް ބަޔާންކޮށް ކުޑަކުދިންގެ ޙައްޤުތައް ރައްކައުތެރި ކުރުމުގެ ޢާއްމުގަވާއިދު އެކުލަވާލައި އާއްމުކޮށްފިއެވެ.

މިއީ ކުދިންނާ ދެކޮޅަށް ހިނގާ އެކި ބާވަތުގެ ކުށްތަކާއި އިހުމާލުވުމުގެ މައްސަލަތައް ހުއްޓުވުމަށް، ކުޑަކުދިންގެ ޙައްޤުތައް ރައްކައުތެރިކުރުމުގެ ޤާނޫނުގެ ދަށުން އެކުލަވާލާފައިވާ ގަވާއިދެކެވެ.

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ ދަށުން އެކުލަވާލާފައިވާ ކުޑަކުދިންގެ ޙައްޤުތައް ރައްކާތެރި ކުރުމުގެ އާންމު ގަވާއިދުގައި ވަނީ ކުޑަކުއްޖަކާއި މެދު، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގައި ބަޔާންކުރާ ފަދަ ކުށެއް ނުވަތަ އެހެންވެސް ޤާނޫނެއްގައި ބަޔާންކުރާ ޖިނާއީ ޢަމަލެއް ހިންގާފައިވާކަމުގެ މައްސަލައެއްގެ މަޢުލޫމާތު ޗައިލްޑް އެންޑް ފެމިލީ ޕްރޮޓެކްޝަން ސަރވިސްއަށް ހުށައެޅޭތާ ގިނަވެގެން 24 ގަޑިއިރުގެތެރޭގައި އެމައްސަލައެއް ތަޙުގީގުކޮށް ފިޔަވަޅު އެޅުމަށް ފުލުހުންނަށް ހުށައަޅަންޖެހޭނެ ކަމަށެވެ. ކުޑަކުދިންގެ ޙައްގުތައް ރައްކާތެރިކުރުމުގެ ޤާނޫނުގައި ކުދިންގެ ކަރާމާތަށް އުނިކަން އަންނަ ފަދަ ކަންކަމާއި ޖިސްމާނީ ގޮތުން އަދި ނަފްސާނީ ގޮތުން ގެއްލުމެއްވެދާފަދަ ކޮންމެ ކަމެއް ހިމަނާފައިވަނީ ކުށެއްގެ ގޮތުގައެވެ. މީގެތެރެއިންވެސް ބަދު އަޚުލާގީ ޢަމަލުތަކާއި އަނިޔާވެރުވުމުގެ ނިޔަތުގައި ކުޑަކުދިންނާއި މެދު ހިންގާ ޢަމަލުތަކަކީ ބޮޑެތި ކުށުގެ ތެރޭގައި ހިމަނާފައިވެއެވެ.

ކުޑަކުދިންގެ ޙައްޤުތަކާއި އެކުދިންގެ ރައްކާތެރިކަން ކަށަވަރުކުރުމަށް ކުޑަކުދިންނާއި ގުޅޭ ގޮތުން ހުށައެޅޭ މައްސަލަތައް ބެލުން އަވަސްކުރުމުގެ މަސައްކަތް ދައުލަތުގެ ކަމާގުޅުންހުރި އިދާރާތަކުން އަންނަނީ ކުރަމުންނެވެ. މިގަވާއިދުގެ ދަށުން ގިނަ މަސްއޫލިއްޔަތުތަކެއް ވަނީ ޗައިލްޑް އެންޑް ފެމިލީ ޕްރޮޓެކްޝަން ސަރވިސް އާއި ޙަވާލުކޮށްފައެވެ. އެގޮތުން އެހީތެރިކަމަށް ބޭނުންވެފައިވާ ކުޑަކުދިންނަށާއި، އެ ކުދިންގެ ޢާއިލާތަކަށް އެހީތެރިކަމާއި އެއްބާރުލުން ދިނުމާއި، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި، އެ ޤާނޫނުގެ ދަށުން އެކުލަވައިލާ ގަވާއިދުތަކުގައި ބަޔާންކޮށްފައިވާ ޚިދުމަތްތައް ދިނުމާއި މަސްތުވާތަކެތީގެ ޝިކާރައަކަށްވާ ކުދިންނަށް ފަރުވާ ދިނުމުގެ ކަންކަން އެންޑީއޭ އާއި ގުޅިގެން ކުރިއަށް ގެންދިޔުމާއި ދައުލަތުގެ ބެލުމުގެ ދަށަށް ގެންނަ ކުދިން ފޮސްޓަރ ކުރުމާއި ގުޅޭ ކަންކަން ކުރުމާއި ކުޑަކުދިންނާއި ގުޅޭ ދިރާސާތައްކޮށް މަޢޫލޫމާތު އެއްކުރުމަށް ވަނީ ޙަވާލުކޮށްފައެވެ.

މިގަވާއިދަކީ ކުޑަކުދިންގެ ޙައްޤުތަކަށް އުނިކަން ލިބޭގޮތަށް ވާހަކަދައްކައި، އެކަންކަމަށް ހިތްވަރުދޭ ފަރާތްތަކާމެދު ފިޔަވަޅު އެޅުމާބެހޭ އުސޫލާއި، ލާމަރުކަޒީ ނިޒާމުގެ ތެރެއިން ކުޑަކުދިންގެ ޙައްޤުތައް ރައްކައުތެރި ކުރުމުގެ ކަންކަން ކުރާނެ ގޮތުގެ އުސޫލާއި، ޢާއިލާއިން ކުރާ މަސައްކަތްތަކުގައި ކުޑަކުދިން ބައިވެރިކުރުމާބެހޭ އުސޫލާއި، އިދާރީ ފިޔަވަޅު އެޅުމާބެހޭ އުސޫލާއި، ކުއްޖެއްގެ އުފަންވުން ރަޖިސްޓަރީނުކުރާ މައިންބަފައިންނާމެދު ފިޔަވަޅު އެޅުމާއިބެހޭ އުސޫލާއި، ކުޑަކުދިންގެ ޙައްޤުތަކަށް އުނިކަން ލިބޭ ފަދަ ކަމެއް ކުރާ ފަރާތްތަކާމެދު ފިޔަވަޅު އެޅުމާބެހޭ އުސޫލާއި، ކުޑަކުދިންނާބެހޭ ޚިދުމަތްތައް ޕްރައިވެޓައިޒް ކުރާނަމަ ޢަމަލުކުރަންޖެހޭ ގޮތުގެ އުސޫލު ކަނޑައެޅުމުގެ ގޮތުން ޤާނޫނުން ބާރުލިބިގެން އެކުލަވާލާފައިވާ ގަވާއިދެކެވެ.

ކުޑަކުދިންނާ ގުޅުންހުރި މައްސަލަތަކާއި ކުޑަކުދިންނަށް އަނިޔާވެރިވުމުގެ މައްސަލަތައް ގިނަވަމުން އަންނަކަމަށް މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސަސްގެ ތަފާސްހިސާބުތަކުން ދައްކައެވެ.

މިފަދަ މައްސަލަތައް އިތުރުވަމުން އަންނައިރު ޢާއިލާގެ ފަރާތުންނާއި ޖަމާޢަތުގެ ފަރާތުންނާއި، ދައުލަތުގެ ފަރާތުން ޚާއްޞަ އެހީތެރިކަމާއި ޚާއްޞަ ރައްކާތެރިކަން ލިބުމަކީ ކުޑަކުދިންނާއި، ޅަފުރައިގެ ކުދިންނަށް ލިބިގެންވާ ޙައްޤެއްކަމުގައާއި، ކުޑަކުދިންނާއި، ޅަފުރައިގެ ކުދިންނަށް އެއްވެސް ގޮތަކުން ހާނިއްކަކޮށް، ޖިންސީގޮތުން އަނިޔާކޮށް އެއްވެސްގޮތަކުން ތަފާތުކޮށް އެކަށީގެންނުވާ އިޤްތިޞާދީ، އިޖްތިމާޢީ ކަންތައްތަކުގައި ބައިވެރިކޮށް އެ މީހުންގެ ފުށުން ނާޖާއިޒު މަންފާތައް ޙާޞިލްކުރުމަށް ހަމަ އެކަކުވެސް މަސައްކަތްކޮށްގެންނުވާނެކަމަށް ޤާނޫނު އަސާސީގައިވަނީ ބަޔާންކޮށްފައެވެ.