އިޓަލީގެ އޭސީ މިލާންގެ ޖާޒީ ނަންބަރު 9 އެއީ ވަރަށް ޝަރުފުވެރި ނަމްބަރެއް ކަމަށާއި އެނަންބަރު ޖާޒީށް ކުޅޭ ކުޅުންތެރިޔަކު ވަރަށް ގޯލާ ރަށްޓެހިވާނެކަމަށް ކުރިން މިލާންގެ 9 ނަމްބަރު ޖާޒީގައި ކުޅުނު ފިލިއްޕޯ އިންޒާގީ ބުނެފިއެވެ.
އިންޒާގީ މިމޭރުމުން ވާހަކަ ދައްކާފައި މިވަނީ އޭސީ މިލާނަން ހުސްވި ސީޒަންގައި ކުޅުނު ސްވިޑެންގެ ޒަލަޓަން އިބްރަހިމޮވިޗުގެ އައު އެއްބަސްވުމާއެކު މިލާންގައި މަޑުކުރަން ނިންމި ދަނޑިވަޅެއްގައެވެ. މިހާރު އުމުރުން 38 އަހަރުގެ ކުޅުންތެރިޔާ ބެލެވޭ ގޮތުގައި ކުރިޔަށް މިއޮތް ސީޒަނުގައި މިލާންގައި ބޭނުން ކުރާނީ 9 ނަންބަރުގެ ޖާޒީއެވެ. ހުސްވި ސީޒަންގައި އޭނާ ބޭނުންކުރީ 21 ނަންބަރު ޖާޒީއެވެ.
އިންޒާގީ ބުނީ މިލާންގެ 9 ނަމްބަރަކީ އާދައިގެ ނަންބަރެއް ނޫންކަމަށް އެއީ ކާމިޔާބު ހޯދާފައިވާ ކުލަބުގެ ކުރީގެ ކުޅުންތެރިންގެ ނަންބަރަކަށް ވުމުން ކޮންމެ ކުޅުންތެރިޔަކަށް ވެސް އެއީ ބޮޑު ޒިންމާއެއްކަމަށެވެ. މިލާންގެ 9 ނަންބަރަށް ފަހުން ކުޅުނު ކުޅުންތެރިންނަކަށް އެޖާޒީގައި ކާމިޔާބު ދުވަސްތަކެއް ހޭދަކުރެވިފައެއް ނުވެއެވެ. އޭގެތެރޭގައި ފެނާންޑޯ ޓޮރޭސްއާއި، ގޮންޒާލޯ ހިގުއިންއާއި އެލެކްސެންޑަރ ޕަޓޯ ފާހަގަކޮށްލެވެއެވެ. އިންޒާގީ ވަނީ އިބްރަހިމޮވިޗުގެ 9 ނަންބަރު ޖާޒީ ހަވާލު ކުރުމާމެދު އޭނާގެ އެއްވެސް މައްސަލައެއް ނެތްކަމަށް ހާމަކޮށްފައެވެ.
އިންޒާގީ ބުނީ 9 ނަންބަރު ޖާޒީގައި މިލާންގައި ކުޅުމަކީ ބޮޑު ގޮންޖެހުމެއް ކަމަށާއި އިބްރަހިމޮވިޗު 9 ނަންބަރުގައި ކުޅެލުމަކީ އޭނާއަށް ލިބެނޭ ބޮޑު އުފަލެއްކަމަށެވެ. ލާޒިޔޯއާއެކު ކާމިޔާބު ސީޒަނެއް ނިންމާލި ކޯޗު ބުނީ 9 ނަންބަރު މިލާނުން ރިޓަޔަރ ކޮށްގެން ނުވާނެކަމަށާއި ޖޯޖް ވިއަރ އާއި މާކޯ ވެންބާސްޓަން ވެސް މިލާންއާއެކު ކާމިޔާބު ދުވަސްތަކެއް އެނަންބަރާއެކު ހޭދަކުރާނެކަމަށެވެ. އަދި ވެންބާސަންޓަން ފަހު ވެސް އެ ނަންބަރު ރިޓަޔާ ނުކުރާކަން އިންޒާގީ ފާހަގަކުރިއެވެ. މިލާނުން ވަނީ އައު ސީޒަނަށް ތައްޔާރުވުމުގެ ގޮތުން މިހާރު ތަމްރީންތައް ފަށާފައެވެ.