ދ. ވާނީ ޓްރެއިނިންގ ސެންޓަރާއި އައްޑޫ ސިޓީގައި ތަރައްޤީކުރާ ނޭޝަނަލް ކޮލެޖް ޕޮލިސިން އެންޑް ލޯ އެންފޯރސްމަންޓް ސްޓަޑީސްއާއެކު ރާއްޖޭގެ ފުލުހުންގެ ތަމްރީންކުރުމުގެ މަސައްކަތް އެހެން ހަރުފަތަކަށް ގެންދެވޭނެކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ދ.ވާނީގައި ޤާއިމުކޮށްފައިވާ ފުލުހުންގެ ޓްރެއިނިނގް ސެންޓަރުގެ ފޭސް ދޭއްގެ މަސައްކަތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ ރާއްޖޭގައި ފުލުހުން ތަމްރީނުކުރުމަށް ހުރި ގޮންޖެހުންތައް ވަޒަންކުރައްވައި އެކަމުގައި އެންމެ ފުރަތަމަ އެހީތެރިކަން ފޯރުކޮށް ދެއްވި ފަރާތަކީ އިންޑިއާ ސަރުކާރުކަމަށެވެ. އެގޮތުން ދ.ވާނީގައި ދެވަނަ ފިޔަވަހީގެ ދަށުން 8 މިލިއަން ރުފިޔާގެ ޓްރެއިނިންގ ސެންޓަރެއް އިންޑިއާ ސަރުކާރުގެ ހިލޭ އެހީގެ ދަށުން ތަރައްޤީކޮށްފައި ވާއިރު މީގެ ސަބަބުން ފުލުހުނަށް ބޭނުންވާ ތަމްރީންތައް ކުރިއަށްގެންދިޔުމުގައި ބޮޑެތި ބަދަލުތައް ގެނެވި އެދާއިރާ ހަރުދަނާކުރެވޭނެކަމަށް ސިޕީ ޙަމީދު ވިދާޅުވިއެވެ.
ރާއްޖޭގައި އޮތީ ޒުވާން ފުލުހުންގެ މުވައްސަސާއެއް ނަމަވެސް ތަމްރީނާއި ތަޖުރިބާއާއެކު ރާއްޖޭގައި އޮތް ފުލުހުންގެ މުވައްސަސާއަކީ ޤާބިލު މުވައްސަސާއެއްކަމަށް ސީޕީ ޙަމީދު ވިދާޅުވިއެވެ. އަދި އަންނަ އަހަރު އިންޑިއާ ސަރުކާރުގެ އެހީގައި އައްޑޫ ސިޓީގައި ޤާއިމްކުރާ ނޭޝަނަލް ކޮލެޖް ޕޮލިސިން އެންޑް ލޯ އެންފޯރސްމަންޓް ސްޓަޑީސްއާއެކު ރާއްޖޭގައި ފުލުހުންނަށް ދޭ ތަމްރީންތައް އެހެން ޙަރުފަތަކަށް ގެންދެވޭނެކަމަށް ސީޕީ ޙަމީދު ވިދާޅުވިއެވެ.
"ރާއްޖޭގައި ފުލުހުންގެ މުވައްސަސާ ހަރުދަނާކުރުމަށް ގިނަ ގިންޖެހުންތަކެއް ހުރިކަމަށް ވިސްނާ އެކަމުގައި ބައިނަލްއަޤުވާމީ ފުރަތަމަ ޖަމާޢަތަކަށް ރާއްޖެއަށް އެހީތެރިކަން ފޯރުކޮށްދެއްވީ އިންޑިއާއިން. އިންޑިއާ ސަރުކާރުގެ އެހީގެ ދަށުން ރާއްޖޭގައި ތަރައްޤީކުރާ މިދެޓްރެއިނިންގ ސެންޓަރާއެކު ރާއްޖޭގައި ޕޮލިސް ޓްރެއިނިންގ އިތުރަށް ހަރުދަނާކޮށް އިތުރު ހަރުފަތަކަށް ގެންދެވޭނެ." ސީޕީ ހަމީދު ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވީ ރާއްޖޭގެ އަމާން ބެލެހެއްޓުމުގެ ޒިންމާ އަދާކުރާ ފަރާތްތަކަށް ބޭނުންވާ އެހީތެރިކަން ފޯރުކޮށް ދެއްވުމަކީ އިންޑިއާއަށް ލިބޭ ޝަރަފެއްކަމަށެވެ. އަދި ފުލުހުންގެ މުވައްސަސާގައި އިންޑިއާއިން ތަމްރީނު ޙާސިލުކޮށްފައިވާ ގިނަ އަދަދެއްގެ ފުލުހުން ތިބިކަން ފާހަގަކުރައްވާ ސަފީރުވަނި ފުލުހުންގެ މުވައްސަސާ ހަރުދަނާކުރުމަށް ބޭނުންވާ ފުރިހަމަ އެއްބާރުލުން އިންޑިއާގެ ފަރާތުން ލިބޭނެކަމުގެ ޔަގީންކަން އަރުވާފައެވެ.
"އިންޑިއާއިން އަބަދުވެސް ރާއްޖެއަށް އެހީތެރިވުމުގައި ދެމިއޮންނާނެ. ރާއްޖެއާ ދެމެދު އޮތް ގުޅުމަކީ ޚާއްސަ ގުޅުމެއް. މިހާރު ކުރިމަތިވެފައިވާ ކޯވިޑް-19ގެ ޙާލަތުގައިވެސް އިންޑިއާއިން އެންމެ ފުރަތަމަ އެހީތެރިކަން ފޯރުކޮށްދިން ޤައުމަކީ ރާއްޖެ. އެގޮތުން މެޑިކަލް ވަޞީލަތްތަކާއި ކާބޯތަކެތީގެ އެހީތެރިކަން ފޯރުކޮށްދީފައިވާއިރު އެންމެ ފުރަތަމަ އިންޑިއާއަށް މިނާޒުކު ދަނޑިވަޅުގައި އެތެރެވުމުގެ ހުއްދަދިން ފުރަތަމަ ޤައުމަކީ ރާއްޖެ. އަމާޒަކީ އަބަދުވެސް ދެޤައުމުގެ ގުޅުން މިގޮތުގައި ކުރިއަށް ދިޔުން." އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވިއެވެ.
އިންޑިއާ ސަރުކާރުގެ ހިލޭ އެހީގެ ދަށުން ދ.ވާނީގައި ތަރައްޤީކުރި ޕޮލިސް ޓްރެއިނިންގ ސެންޓަރަކީ މިދިޔަ އަހަރު އިންޑިއާގެ އެކްސްޓަރނަލް އެފެއާޒް މިނިސްޓަރ ރާއްޖެއަށް ކުރެއްވި ޒިޔާރަތުގައި ވެދެއްވި 106 މިލިއަން ރުފިޔާގެ އެހީގެ ދަށުން ކުރިއަށްގެންދިޔަ މަޝްރޫޢެކެވެ. މީގެ އިތުރުންވެސް މި އެހީގެ ދަށުން ގނަ މަޝްރޫތަކެއް އަންނަނީ ހިންގަމުންނެވެ. އެގޮތުން އއ.ރަސްދޫ ގިރާ ސަރަޙައްދު ޙިމާޔަތްކުރުމާއި ބ.ފެހެންދޫ ސްކޫލް ކުދިން ދަތުރުކުރުމަށް ޚާއްސަ ފެރީއެއް ފޯރުކޮށްދިނުމާއި އއ. އުކުޅަހުގައި ކޮންވެންޝަން ސެންޓަރެއްވެސް ވަނީ ޤާއިމުކޮށްފައެވެ.